सुनसरीःः नेपाल कम्युनिष्ट पार्टीका संस्थापक नेता पुष्पलालका वैचारिक एवम राजनीतिक नीतिहरुको प्रचार –प्रसार गर्ने र समाजवादी आन्दोलनमा टेवा पु¥याउने उद्देश्यले गठित ‘पुष्पलाल मित्रता केन्द्र’को १ नम्बर प्रदेश कमिटी गठन भएको छ । सुनसरीको इटहरीमा आइतबार भएको प्रदेश स्तरीय भेलाले भाष्कर काफ्लेको अध्यक्षतामा ३५ सदस्यीय कमिटी गठन भएको हो ।
कमिटीको उपाध्यक्षमा इन्द्र बुढाथोकी र सचिवमा मोतीराज सुनुवारलाई चयन गरिएको छ । अध्यक्षको जिम्मेवारीमा चयन भएका भास्कर झापा निवासी हुन् । त्यसैगरी उपाध्यक्ष वुढाथोकी झापा दमक र सचिव सुनुवार धरानका हुन् । नव गठित पुष्पलाल मित्रता केन्द्रमा १ नम्बर प्रदेशभरीका कम्युनिष्ट राजनीतिमा लागेका नेताहरुलाई समेटिएको छ । जिफण्टबाट मनोहरी शिवाकोटीलाई सदस्यमा चयन गरिएको छ ।
केन्द्रका केन्द्रिय अध्यक्ष जगन्नाथ खतिवडाको प्रमुख आतिथ्यतामा भएको भेलाद्वारा गठित केन्द्रको सदस्यहरुमा झापाबाट पुष्पराज पोख्रेल, लोकबहादुर धिमाल, सन्तलाल मेचे, सिताराम अधिकारी भोजपुरबाट केवल राई र मेरीना राई, तेह्रथुमबाट विष्णुविक्रम सुव्वा, गणेश सेन, गोपाल दाहाल र सोम गौतम, ओखलढुङ्गाबाट शंकर कार्की र शंकर कटवाल, इलामबाट ध्रुव श्रेष्ठ, हिमाल किराती र मुना शर्मा, पाँचथरबाट उपेन्द्र दंगाल र गंगा चेम्जोङ, मोरङबाट वालेश्वर कामत, नारायण भण्डारी र वद्री अर्याल, उदयपुरबाट ज्ञानेन्द्र श्रेष्ठ, केन्द्र राउत र गिता खड्का लगायत छन् । थप सदस्यहरुलाई केन्द्रको वैठकले मनोनित गर्ने ‘पुष्पलाल मित्रता केन्द्र’ का महासचिव रविन कोइरालालले बताए । महासचिव कोइरालाले ‘पुष्पलाल मित्रता केन्द्र’ नेपाल कम्युनिष्ट पार्टी (नेकपा)को सुभेच्छ’क संस्थाका रुपमा रहने र यसमा पुष्पलालका राजनैतिक र वैचारिक आदर्शहरुलाई स्वीकार गर्ने जो कोही आबद्ध हुने सक्ने बताए । महासचिव कोइरालाले यो संस्था कुनै नेताहरुको छाँयाका रुपमा नभई सबै कम्युनिष्ट नेताहरुको माया प्राप्त गर्ने सामाजिक राजनैतिक रुपान्तरण गर्न परिवर्तनकारी संस्था भएको बताए ।
१ नम्बर प्रदेश कमिटी गठन पश्चात अव केन्द्रको सांगठनिक संरचना अनुसार जिल्ला, महानगर, उपमहानगर, नगर, हरेक स्थानीय तहमा पुष्पलाल मित्रता केन्द्र गठन गरेर जाने पनि नव निर्वाचित सचिव सुनुवारले बताएका छन् । कार्यक्रमको उद्घाटन समारोहलाई संबोधन गर्दै केन्द्रका अध्यक्ष जगन्नाथ खतिवडाले कम्युनिष्ट संस्थापनक नेता पुष्पलाल श्रेष्ठलाई सम्मान गर्दै देशमा नागरिक आन्दोलन सहित विकाश र सम्वृद्धि आवश्यक भएकाले सामाजिक जागरणको अभियान सहित राष्ट्र निर्माणमा सहयोग गर्ने बताए । कार्यक्रममा संविधानसभा सदस्य रेवती भण्डारी, केन्द्रका उपाध्यक्ष जयन्ती राई, यदुवंश झा, प्रदेश नम्बर २ का अध्यक्ष राजकुमार यादव लगायतले कार्य सफलताको शुभकामना व्यक्त गरेका थिए । केन्द्रको अहिले देशव्यापी कमिटी गठन तीव्र रुपमा भइरहेको छ ।