धरानः आइतबार बराहक्षेत्र ७ देवीघाट बस्ने एक युवक र युवतीले बराहक्षेत्र ८ ठाकुरबारी नजिकको कोशी नदीको किनारमा हाम्फालेका छन् । उनीहरूको शव भेटिएको छ ।
हामफाल्नेमा बराहक्षेत्र नगरपालिका–७ देवीघाट बस्ने १४ वर्षीय किशोरी मौसम बर्देवा र सोही वडाका १९ वर्षीय पारश लिम्बू रहेको प्रहरीले जनाएको छ । किशोरीको शव पानीमा तैरिरहेको अवस्थामा देखेपछि माछा मार्ने व्यक्तीले इलाका प्रहरी कार्यालयमा खबर गरेका थिए । सो स्थानमा प्रहरी पुग्दा युवतीको शव पानीमा तैरिरहेको इलाका प्रहरी प्रमुख सरण दाहालले बताए ।
खोजी गर्ने क्रममा कोशी किनारमा २ वटा मोबाइल, २ जोर चप्पल, एउटा बोत्तल भेटिएको दाहालले बताए । पछि सशस्त्र प्रहरी बल चतराले किशोरीको शव भेटिएको स्थानभन्दा ६ सय मिटरको दुरीमा युवकको शव भेटिएको सशस्त्र प्रहरी बल चतराका प्रमुख अशोक न्यौपानेले बताए ।
प्रहरी स्रोतका अनुसार समाजले स्वीकार नगर्ने डरले कोशीमा हाम्फालेको हुन सक्ने बताइएको छ । मृतक दुवैको शवलाई पोष्टमाष्र्टमका लागि बीपी विज्ञान प्रतिष्ठान धरान पठाइएको न्यौपानेले बताए । उनीहरु आइतबार दिउँसोदेखि घरबाट हराएका थिए । थप अनुसन्धान भइरहेको प्रहरीले जनाएको छ । यसअघि पनि इटहरीका एक युवकले प्रेमिकाको अन्तै विवाह भएको भन्दै कोशीमा फाल हानेका थिए ।