धरानः आफ्नै अनुयायीमाथि बलात्कारको आरोप लागेका सिद्धबाबा भनिने कृष्णबहादुर गिरीलाई कारागार चलान गरिएको छ ।
मंगलबार बिहान जिल्ला अदालत सुनसरीमा आफैं उपस्थित भएका उनलाई कारागार चलान गरिएको जिल्ला प्रहरी कार्यालय सुनसरीका प्रमुख प्रहरी उपरीक्षक विनोद शर्माले जानकारी दिए । गिरी अदालतमा उपस्थित भएको जानकारी पाएलगत्तै प्रहरी त्यहाँ पुगेको थियो । उच्च अदालतले अनुयायीमाथि बलात्कार गरेको आरोपमा उच्च अदालतले ९ माघमा पुर्पक्षका लागि थुनामा पठाउन आदेश दिएको थियो । गिरी भने अदालतमा बहस हुँदै गर्दा भारततिर भागेका थिए ।
त्यसैगरी १६ मंसिरमा जिल्ला अदालत, सुनसरीले उनलाई तीन लाख रुपैयाँ धरौटीमा छाड्न आदेश दिएको दिएको थियो । तर, जिल्लाको आदेशविरुद्ध सरकारी वकिल कार्यालय उच्च अदालत, बिराटनगर पुगेको थियो ।
उनलाई सुनसरीको चतराधामस्थित आफ्नै आश्रममा कात्तिक पहिलो साता बलात्कार गरेको आरोप लागेको थियो ।