धरानः कोरोना भाइरसको सङ्क्रमणको आशङ्कामा एक बिरामीलाई धरान रेफर गरिएको छ ।
कोरोना भाइरस सङ्क्रमण भएको आशङ्का गरिएका बिरामीलाई बीपी कोइराला स्वास्थ्य विज्ञान प्रतिष्ठान धरानले पेइङ वार्डलाई हाल आइसोलेसन वार्ड बनाएको छ । विराटनगरस्थित कोशी अस्पतालमा भर्ना भएका एकजनालाई अस्पतालले धरानस्थित बीपी प्रतिष्ठान पठाएको हो ।
अस्पतालका सूचना अधिकृत विष्णु बुढाथोकीले विदेशबाट केहीदिनअघि विराटनगर आएका उनलाई प्रतिष्ठानको आइसोलेसन वार्डको लागि रेफर जानकारी दिए । ज्वरो देखिएपछि थप उपचारका लागि उनलाई रेफर गरिएको उनको भनाइ छ । बीपीका सहप्रवक्ता डा. अशोक ऐरले भने सो बिरामीको विषयमा विस्तृत जानकारी आइनसकेको बताउँछन् ।
यता प्रतिष्ठानमा कोभिड–१९ सङ्क्रमण भएको आशङ्कामा आइसोलेसनमा राखिएका दुईमध्ये एकजनालाई डिस्चार्ज गरिएको छ । एक महिला निको भएर डिष्चार्ज भइसकेकी छिन् । उनले यसअघि बीपी प्रतिष्ठानमा यसअघि आइसोलेसनमा रहेका केही व्यक्तिमा सङ्क्रमण नभेटिएको जानकारी दिए ।