धरानः विश्व स्वास्थ्य संगठन (डब्लूएचओ) ले कोरोना भाइरसको केन्द्रबिन्दु अब यूरोप भएको बताएको छ ।
डब्लुएचओका प्रमुख डा टेड्रोस अधानोम गेब्रेससले पछिल्लो अवस्था हेर्दा कोरोना भाइरसको महामारीको केन्द्रविन्दु यूरोप रहेको बताए । चीनको वुहानबाट सुरु भएको कोरोना भाइरसको संक्रमण अहिले १४५ देशमा फैलिएको छ । चीनमा महामारी नियन्त्रण नजिक पुगिसकेकोले महामारीको केन्द्रबिन्दु अब यूरोपलाई मानिएको हो ।
डब्लूएचओका प्रमुख गेब्रेससले सबै देशहरुलाई जीवन बचाउन आक्रामक उपाय, समुदाय परिचालन र सामाजिक दूरी प्रयोग गर्न आग्रह गरे । उनले अहिले बलिरहेको संक्रमणको आगो थप फैलन नदिन सबै लाग्नुपर्ने बताए । धेरै यूरोपेली देशहरुमा संक्रमण र मृत्युमा एकदमै उकालो लागेको खबर आइरहेको भन्दै उहाँले चिन्ता व्यक्त गरेको पनि खबरमा उल्लेख छ ।
पछिल्लो २४ घण्टामा मात्र इटलीमा कोरोना भाइरसको संक्रमणबाट २५० जनाले ज्यान गुमाएका छन् । यो सँगै इटलीमा ज्यान गुमाउनेको संख्या १२६६ पुगेको छ। शनिबारसम्म इरानमा ५१४, चीनमा ३१७७, दक्षिण कोरियामा ७२, स्पेनमा १३३, फ्रान्समा ७९, अमेरिकामा ४८, जापानमा २१, यूके ११, बेल्जियम ३, स्वीजरल्याण्ड ११, नेदरल्याण्ड १० जनाको ज्यान गएको छ ।
यी देशमा कोरोनाका संक्रमण उच्च छ । यस्तै स्पेनमा १३३ जनाको ज्यान गइसकेको छ भने ५२३२ जनामा संक्रमण पुष्टि भएको छ ।