धरानः कोरोना (कोभिड–१९) भाइरसबाट संक्रमितका लागि उपचार गर्नका लागि चितवनमा ७२ घण्टामै अस्पताल बनेको छ ।
चितवनको भरतपुरमा अस्थायी अस्पताल ७२ घण्टामै बनेको हो । त्यहाँस्थित प्रदर्शनी कक्षलाई मंगलबारबाट अस्पतालको रुपमा तयार गर्न शुरु गरिएको र शुक्रबार ७२ घण्टा हुँदा सो भवनलाई अस्पतालको स्वरुपमा तयार गरिने र औपचारिक सञ्चालनमा ल्याउने बताइएको छ ।
भरतपुर महानगरपालिकाकी मेयर रेणु दाहालले सो अस्पताललाई शुक्रबार सञ्चालनमा ल्याइने जानकारी दिइन् । ‘भोलिबाट अस्पताल सञ्चालनमा आउनेछ। हामीले भनेको ७२ घण्टामा निर्माण गर्न सफल भयौं,’ दाहालले भनिन् । त्यसलाई भरतपुर कोरोना विशेष (अस्थायी) अस्पताल नाम दिइएको छ ।
अस्पतालमा १० बेड सहितको आइसीयू, अत्याधुनिक तथा विशेष सुविधासहितका थप १० बेड सहितको अर्को एकाई र ५० बेड सहितको जनरल वार्ड तयार गरिएको छ ।