धरानः उदयपुर त्रियुगा–९ झिल्के चोक बस्ने ६२ वर्षीय तिलक दनुवार र सोही स्थानका १४ वर्षीय रोशन दनुवारको एम्बुलेन्सको ठक्करबाट मृत्यु भएको छ ।
शुक्रबार साँझ झिल्केचोकस्थित बाटो छेऊमा बसिरहेका दुवैजनालाई चुहाडेबाट गाईघाटतर्फ आउँदै गरेको स१झ ४७७ नम्बरको एम्बुलेन्सले ठक्कर दिँदा गम्भीर घाईते भएकोमा तिलकको उपचारको क्रममा जिल्ला अस्पताल उदयपुरमा र रोशनको न्यूरो अस्पताल विराटनगरमा शनिबार बिहान मृत्यु भएको जिल्ला प्रहरी कार्यालय उदयपुरले जनाएको छ ।
यसैगरी उनीहरूसँगै बसेका ३२ वर्षीय राजकुमार दनुवारलाई समेत सोही एम्बुलेन्सले ठक्कर दिँदा गम्भिर घाइते भएकोमा उनको न्यूरो अस्पताल विराटनगरमा उपचार भइरहेको छ । ठक्कर दिने एम्बुलेन्स र एम्बुलेन्स चालक सन्तोष खत्री नियन्त्रणमा रहेको कार्यालयले जनाएको छ ।
उता भोजपुरमा चटयाङले लागेर एकको मृत्यु भएको छ । भोजपुर ट्याम्केमैयुम–३ गिरी टोल बस्ने ५७ वर्षीया दुर्गामाया गिरीको चट्याङले लागी मृत्यु भएको हो । आफ्नै घरमा बसिरहेको अवस्थामा अचानक परेको चट्याङ लागी घाइते भएकी दुर्गामायाको जिल्ला अस्पताल भोजपुरमा उपचारको क्रममा शुक्रबार साँझ पौने ७ बजे मृत्यु भएको जिल्ला प्रहरी कार्यालय भोजपुरले जनाएको छ ।