धरानः सरकारले सोमबारदेखि लामो दुरीका सार्वजनिक गाडी चलाउन रोक लगाएको छ । तर निजी गाडीलाई भने चलाउन दिने भएको छ । कोरोना भाइरस (कोभिड १९) को जोखिम बढ्दै गएकाले सरकारले सोमबारदेखि लामो दुरीका सार्वजनिक गाडीमा रोक लगाएको हो ।
निजी गाडीलाई भने अहिलेसम्म रोक नलगएकोे यातायात व्यवस्था विभागले जनाएको छ । विभागका महानिर्देशक गोगनबहादुर हमालले एउटै जिल्लाभित्र गाडी चलाउन पाएपनि एक जिल्लाबाट अर्को जिल्लामा सार्वजनिक गाडी चलाउन नपाइने बताए ।
कोरोना भाइरसको संक्रमण नफैलियोस् भनेर सरकारले केही दिनका लागि सार्वजनिक यात्रुवाहक सवारीसाधनलाई एउटा जिल्लाबाट अर्को जिल्लामा जान रोक लगाएको हो ।
त्यस्तै निजी सवारी साधन तथा र मोटरसाइकल र स्कुटर लामो दुरीमा चल्न पाउने यातायात व्यवस्था विभागका महानिर्देशक हमालले जानकारी दिए । ‘लामो दुरीको यात्रा गर्दा एउटा यात्रुमा संक्रमण भए अरुमा पनि सर्न सक्छ । धेरै यात्रु एउटा गाडीमा हुँदा जोखिम बढ्छ,’ उनले भने ‘निजी सवारी साधन रोक लगाउने कुरा छैन । केही नयाँ निर्णय भयो भने हामी सूचना निकाल्छौं ।’