इलामः इलाम देउमाई–६ शान्तिडाँडा बस्ने २५ वर्षीया सुष्मा राई आफ्नै बुबाको हत्या आरोपमा पक्राउ परेकी छिन् ।
खाना खाएर घरमा बुबासँग गफ गरेर बसिरहेको अवस्थामा एक्कासी घरायसी विषयमा विवाद हुन थालेपछि सोमबार राति ११ बजे सुष्माले बुबा ५१ वर्षीय फूलबहादुर राईलाई बन्चरोले टाउँकोमा प्रहार गरी हत्या गरेको अनुसन्धानबाट खुल्न आएको छ ।
फूलबहादुर आफ्नै घर भित्र मृत अवस्थामा फेला परेको भनी आफन्तले इलाका प्रहरी कार्यालय मंगलबारेमा खबर गरेका थिए । घटनाको जानकारी पाउनसाथ जिल्ला प्रहरी कार्यालय इलामबाट समेत घटनास्थलमा खटिएको प्रहरी टोलीले मृतक राईको हत्या भएको पुष्टि गरेसँगै हत्यामा संलग्न सुष्मालाई जंगलमा लुकिछिपी बसेको अवस्थामा घटनामा प्रयोग भएको बन्चरो सहित पक्राउ गरेका हो ।
झगडाको निहुँमा छोरीले बाबुको हत्या गरेको हुनसक्ने इलाका प्रहरी कार्यालय मंगलबारेका प्रहरी निरीक्षक राजकिशोर शाहले बताए ।
रातको समयमा झगडा हुँदा छोरीले नै हत्या गरेको प्रहरीको अनुसन्धानबाट खुलेको छ । घरमा जेठी छोरी सुष्मा, उनका बुबा र आमा मात्र रहेको अवस्थामा राति खाना खाइसकेपछि पनि झगडा भएको थियो ।
फुलबहादुरको टाउकोमा चोट देखिएको छ । टाउकोमा चिर्पट प्रहार गरेर हत्या गरेको हुनसक्ने प्रहरीको अनुमान छ । कान्छी छोरी र ज्वाइँसमेत शान्तिडाँडा घरमा आएका र दिउँसो पनि झगडा भएपछि गाउँ गएका स्थानीयले बताएका छन् ।