मोरङः कोसी अस्पतालको कोभिड–१९ उपचार केन्द्रमा उपचार गराइरहेका कोरोना सङ्क्रमितमध्ये थप आठ जना निको भएका छन् । उनीहरूलाई बुधबार डिस्चार्ज गरिएको हो ।
प्रदेश १ मा कोरोना संक्रमित ५९ जना छन् । अहिले निको भएर घर फर्किनेको संख्या २६ पुगेको छ । कोरोनामुक्त भएर डिस्चार्ज भएकाहरूलाई पुष्पगुच्छा दिएर बिदाइ गरिएको थियो । डिस्चार्ज हुनेमा उदयपुरको त्रियुगा नगरपालिका–३ भुल्केका ३ जना र ५ जना भारतीय नागरिक छन् ।
डिस्चार्ज हुनेहरू ५ र ९ वैशाखमा कोशी अस्पताल कोभिड १९ उपचार केन्द्रमा भर्ना भएका थिए । डिस्चार्ज भएका ५ जना भारतीय नागरिकलाई विराटनगर १५ को रानी मरकज क्वारेन्टाइनमा र उदयपुरका ३ जनालाई भुल्के पठाइएको कोभिड अस्पतालका जनस्वास्थ्य अधिकृत ज्ञानबहादुर बस्नेतले जानकारी दिए ।
यससँगै नेपालमा कोरोनाबाट निको हुनेको संख्या ४५ पुगेको छ । हालसम्म नेपालमा ४ सय २ जनामा संक्रमण देखिएको छ भने २ जनाले कोरोना ज्यान गुमाइसकेका छन् ।
कोशी अस्पतालकी मेडिकल सुपरिटेन्डेन्ट डा. संगीता मिश्रले केन्द्रमा अहिले २८ संक्रमितको उपचार भइरहेको बताइन् । तीमध्ये अहिलेसम्म सुनसरीको इटहरी–२ का १८ वर्षीय किशोरमा मात्रै कोरोनाको लक्षण देखिएको मिश्रले बताइन् । धनकुटा अस्पतालका चिकित्सक र उनको परिवार सदस्यसहित ५ संक्रमितलाई पनि केन्द्र ल्याइँदै गरेको मिश्रले जानकारी दिइन् ।