धरानः नेपालमा पहिलोपटक भर्च्युअल विश्व कवि सम्मेलन हुने भएको छ ।
अनलाइन डिजिटल माध्यमबाट विश्वभर छरिएर बसेका नेपाली कवि र स्रोताहरूलाई एकै ठाउँमा जोडेर कविता सुन्न र सुनाउन सम्मेलन आयोजना गरिएको आयोजक जेभियर इन्टरनेसनल स्कुलरकलेजका भाइस प्रिन्सिपल दिपेन दाहालले जानकारी दिए ।
‘मेरो कविता र म’ शीर्षकमा आयोजना हुने सम्मेलन यही जेठ ९ गते शुक्रबार दिउँसो १ बजेदेखि प्रत्यक्ष प्रशारण हुनेछ । यस सम्मेलनमा देश–विदेशबाट धेरै कवि र स्रोताहरूको अनलाइन उपस्थिति रहने छ ।
सम्मेलनमा सहभागिताका लागि अनलाइन फाराम भर्न सकिनेछ । त्यसका लागि digitalpoem2020@gmail.com मा इमेल गरेर अनुरोध गर्न सकिने छ । अनलाइनमा पनि विद्यार्थीलाई पढाइको साथसाथै अतिरिक्त क्रियाकलापमा पनि संलग्न गराउन सकिने जेभियरका भाइस प्रिन्सिपल दाहालले बताए ।
अनलाइनमार्फत् विद्यार्थीलाई अतिरिक्त क्रियाकलापमा कसरी संलग्न गराउन सकिन्छ भन्ने अन्योल रहेकै बेला भाइस प्रिन्सिपल दाहालले विद्यार्थीको अतिरिक्त क्रियाकलापलाई फराकिलो दायरा बनाउँदै विश्व कविता सम्मेलन आयोजना गर्न लागेका हुन् । सम्मेलनमा झन्डै एक दर्जन बढी दिग्गज कवि विश्वको विभिन्न स्थानबाट सहभागी जनाउँदैछन् । विद्यार्थीका लागि समेत अनलाइन रजिष्ट्रेशन फर्म राखिएको छ । उनीहरुले त्यो फर्म भरेर आफ्ना रचना पठाउन सक्ने छन् । उत्कृष्ट रचनालाई जेठ ९ गते आयोजना हुने विश्व कविता सम्मेलनमा रचना पाठ गर्ने अवसर पाउनेछन् । आयोजक दाहालका अनुसार ‘दिग्गज कविका अगाडि विद्यार्थी पनि प्रस्तुत हुन पाउनेछन् । उनीहरूले आफ्ना रचना सबैसामु राख्न पाउनेछन् । जसले गर्दा विद्यार्थीहरूमा सिर्जनशील क्षमताको अभिवृद्धि हुनेछ ।
दाहालकै संयोजकत्वमा हुन थालेको विश्व भर्च्युअल कविता सम्मेलनमा सुनसरी बाट इन्द्रकुमार श्रेष्ठ सरित, ओखलढुंगाबाट चेतनाथ धमला, झापाबाट बाबुराम नेउपाने उत्स, ललितपुरबाट ललिता दोषी, जापानबाट केबी पारखी, सिएट्ल अमेरिकाबाट बुना दाहाल, म्यान्मारबाट राजन ढकाल, काठमाडौंका कवि रामेश्वर राउत मातृदास, शान्ति शर्मा, राजन नेउपानी श्रीएम, चेन्नाइ भारतबाट लक्ष्मी उपे्रती, दार्जिलिङबाट मनप्रसाद सुब्बा र जर्मनीबाट चिरञ्जीवी भट्टराईले सहभागिता जनाउनेछन् । सम्मेलनको विभिन्न एफएम रेडियो, फेसबुक र विभिन्न अनलाइनहरुबाट प्रत्यक्ष प्रशारण हुनेछ । नेपाली साहित्यमा रुचि राख्ने विद्यार्थी, अभिभावक र शुभचिन्तकहरुलाई उक्त कार्यक्रममा जोडिन संयोजक दाहालले अनुरोध गरेका छन् ।