दिलकुमार लिम्बू
ताप्लेजुङः ताप्लेजुङको सिरिजंघा गाउँपालिका बुरुम्खिम गाउँमा भएको झगडा मिलाएर प्रहरी चौकी फर्कदै गर्दा प्रहरी इञ्चार्जको बाटोमै मृत्यु छ ।
गाउँमा झगडा मिलाएर कार्यालयतर्फ फर्कदै गरेका ताप्लेजुङको सिरिजंघा गाउँपालिका वडा नं ७ मा रहेको खेवाङ प्रहरी चौकीका इञ्चार्ज प्रहरी सहायक निरीक्षक (असई) बालकुमार राईको बाटैमा मृत्यु भएको हो । तावाखोला खेवाङ प्रवेश मार्ग हो, अचानक असहज महसुस भएपछि स्थानीय कुमार सार्कीको घरसम्म पुगेका उनले त्यसपछि बान्ता गर्न थालेको र केही समयमै उनको मृत्यु भएको खबर प्राप्त भएको ताप्लेजुङका प्रमुख जिल्ला अधिकारी डोरेन्द्र निरौलाले जानकारी दिए ।
प्रहरी कार्यालय ताप्लेजुङमा प्रहरी प्रमुख(डिएसपी) महेन्द्रकुमार श्रेष्ठको नेतृत्वमा टोली घटनास्थलतर्फ प्रस्थान गरेको समेत प्रजिअ निरौलाले जानकारी दिए । भोजपुरको लेकखर्क घर भई अहिले झापाको दमक बस्दै आएका ४२ वर्षीय राई केही महिना अघि मात्र प्रहरी इन्चार्ज भएर खेवाङ पुगेका थिए ।