झापाः स्वास्थ्य तथा जनसंख्या मन्त्रालयले बिहीवार झापामा थप २३ जना कोरोना संक्रमित रहेको पुष्टि गरिसकेको छ । यससँगै त्यहाँ संक्रमितको संख्या ३३ पुगेको छ ।
भारतबाट आएका २ सय १० मध्ये पथरिया माविस्थित क्वारेन्टाइनमा रहेकाहरूको परीक्षणमा १० जना र लक्ष्मी प्रसाद देवकोटा माविस्थित क्वारेन्टाइनमा रहेकाको परीक्षण गर्दा २३ जना संक्रमित फेला परेका हुन् । तर त्यहाँ अहिलेसम्म पीसीआर टेस्ट भने भएको छैन । गाउँपालिकाका अध्यक्ष अञ्जारा आलमका अनुसार स्वास्थ्य सामग्रीको अभाव देखिएकोले टेष्ट नभएको हो । ‘परीक्षण गर्ने किटको अभाव देखिएको छ । त्यसैले सबैको परीक्षण नभएको हो ।’ उनले भने ।
उनले दिएको जानकारीअनुसार पथरिया मावि र लक्ष्मीप्रसाद देवकोटा माविबाहेक महेन्द्र रत्न माविमा ९५ र जानकी आधारभूत विद्यालयमा ४० जना क्वारेन्टाइनमा रहेका छन् । चारवटै क्वारेन्टाइनमा रहेका सबैको पीसीआर टेस्ट भने भएको छैन । उनले क्वारेन्टाइनमा रहने सबैको परीक्षण भए संक्रमितको संख्या बढ्ने बताए ।
झापाका प्रमुख जिल्ला अधिकारी उदयबहादुर राना मगरले पनि सबैको परीक्षण गर्न किट नभएको बताए । पछिल्लो तथ्यांकअनुसार कचनकवल गाउँपालिकाको वडा नम्बर ३, ६ र ८ निवासी १५ जना पुरुषहरूमा संक्रमण देखिएको हो । उनीहरू सबै केही दिनअघि भारतबाट आएका हुन् ।