धरानः अभिभावकलाई शुल्कको दबाव दिन थालेको गुनासो बढ्दै गएपछि निजी विद्यालयका सञ्चालकहरूको संगठनले भने दबाव नदिन निर्देशन दिएको छ ।
लकडाउनका बेला शुल्क उठाउन दबाव बढेको अभिभावकबाटै गुनासो आएपछि निजी तथा आवासीय विद्यालय अर्गनाइजेश नेपाल (प्याब्सन) र राष्ट्रिय निजी तथा आवासीय विद्यालय अर्गनाइजेशन नेपाल (एनप्याब्सन) दुवैले यस्तो निर्देशन दिएका छन् ।
प्याब्सनका अध्यक्ष टीकाराम पुरीले लकडाउनका बेला कुनैपनि शुल्क नउठाउन आग्रह गरे । एनप्याब्सनका अध्यक्ष ऋतुराज सापकोटाले संकटको यस्तो घडीमा कुनै पनि विद्यालयले शुल्क तिर्न ताकेता नगर्न आग्रह गरे । प्रतिनिधिसभाको शिक्षा तथा स्वास्थ्य समितिले विद्यालयमा शुल्क नलिन, विद्यार्थी भर्ना, परीक्षा सञ्चालन र पठनपाठन गर्ने व्यवस्था मिलाउन शिक्षा, विज्ञान तथा प्रविधि मन्त्रालयलाई निर्देशन दिइसकेको छ । शिक्षा मन्त्रालयले पनि अर्को निर्णय नहुँदासम्म विद्यार्थी भर्ना, पठन पाठन, परीक्षा र शुल्क नउठाउन निर्देशन दिइसकेको छ ।
उता विद्यालय सञ्चालकहरूले भने लकडाउनले गर्दा शिक्षक तथा कर्मचारीको तलब, भवन भाडा, बैंकको किस्ता व्यवस्थापन आदि गर्न कठिन भएको बताएका छन् ।
लकडाउनकै बेला पनि शुल्क व्यवस्थापन गर्न सक्ने अभिभावकले ऐच्छिक रुपमा विद्यालयलाई सहयोग भने गर्न सक्ने सापकोटा बताउँछन् । विद्यालय सञ्चालकहरूले महामारीले निम्त्याएको समस्या देखाएर अभिभावकलाई दबाव दिनु भन्दा पनि सरकारसँग आफ्नो कुरा राख्नुपर्ने उनले सुझाए । अभिभावकको समस्या सरकार र विद्यालय सञ्चालक दुबैले बुझ्न नसकेको पुरीको गुनासो छ ।