धरानः शनिबार बिहान थप ३२ जनामा कोरोना संक्रमण पुष्टि भएको छ ।
कपिलवस्तु ८, रूपन्देहमा ८, सर्लाहीमा १३, चितवन, काठमाडौं र बारामा १–१ जना संक्रमित थपिएको स्वास्थ्य तथा जनसंख्या मन्त्रालयले जनाएको छ । उनीहरुमध्ये दुई महिला र ३० पुरूष रहेका छन् । यससँगै नेपालमा कोरोना संक्रमितको संख्या ५४८ पुगेको छ ।
हालसम्म ७० जना कोरोनामुक्त भएर घर फर्किएका छन् भने तीन जनाको मृत्यु भइसकेको छ ।
स्वास्थ्य तथा जनसंख्या मन्त्रालयले शनिबार बिहानै ८ः४० बजे विज्ञप्ति जारी गरेर थप ३२ जनामा कोरोना भाइरसको संक्रमण पुष्टि भएको जानकारी दिएको हो । थपिएका ३२ संक्रमितमा १७ वर्षदेखि ५५ वर्षसम्म उमेरका छन् ।
सर्लाहीमा शनिबार थपिएका १३ संक्रमित गोडैता र कविलासी नगरपालिकाका हुन् । जसमा २० वर्षका ३ जना, २६ र ३५ वर्षका २र२ जना, १८, २१, २२, २३, २८ र ३३ वर्षका १–१ जना छन् ।
यस्तै, शनिबार नै थपिएका संक्रमितमध्ये रूपन्देहीका ८ जना छन् । यी व्यक्ति गैडहवा र रोहिणी गाउँपालिकाका हुन् । जसमा २०, २४ र ३० वर्षका २–२ जना र २४ र ५५ वर्षका १–१ जना छन् ।
यस्तै, आज कपिलवस्तुमा पनि ८ कोरोना संक्रमित थपिएका हुन् । वाणगंगा नगरपालिकाका १७, १९, २२, २७, २९, ३५, ४० र ४२ वर्षका एक–एक जनामा कोरोना संक्रमण पुष्टि भएको हो ।
यस्तै आज काठमाडौंमा ३५ वर्षीय पुरुष, चितवनको भरतपुर–६ का ५२ वर्षीय पुरुष र बाराको करैयामाई गाउँपालिकाकी ३७ वर्षीया महिलामा कोरोना संक्रमण पुष्टि भएको हो । आज थपिएका ३२ संक्रमितमा कपिलवस्तु वाणगंगाकी २७ वर्षीया र बाराको करैयामाई गाउँलिकाकी ३७ वर्षीया महिलाबाहेक सबै पुरुष हुन् ।