धरानः चीनले बनाएको खोप ‘प्रभावकारी’ रहेको बताइएको छ ।
कोरोना भाइरसविरुद्धको खोप प्रभावकारी र सुरक्षित देखिएको अनुसन्धानकर्ताको दावी छ ।
अनुसन्धानमा संलग्नहरूले सार्वजनिक गरेको प्रारम्भिक प्रतिवेदनमा खोप कोरोना भाइरसको संक्रमणबाट मानिसलाई जोगाउन सफल देखिएको र सुरक्षित पनि रहेको उल्लेख छ ।
पहिलो चरणको ट्रायलको नतिजासहितको रिपोर्ट द ल्यानसेट जर्नलमा प्रकाशित भएको छ । सो प्रतिवेदनअनुसार १८ देखि ६० वर्षसम्मका १०८ जनामा भएको पहिलो चरणको परीक्षणमा सफलता हात लागेको हो । खोपको एक डोज मात्रै दिइएका व्यक्तिको शरीरमा दुई हप्ताभित्रै टी सेल्स नाम गरेको रोग प्रतिरोधात्मक कोशिका बनेको देखिएको छ ।
बोस्टनमा रहेको बेथ इजरायल डिकोनेस मेडिकल सेन्टरका डा. डान बारोउचले भनेका छन्, ‘यो अति सकारात्मक नतिजा हो, तर अझै अनुसन्धानको खाँचो छ । यो तथ्यांक प्रारम्भिक मात्रै हो । समग्रमा भन्दा अहिलेलाई यो अति सकारात्मक खबर हो ।’
खोपको प्रभावकारिता थप स्थापित गर्नका लागि हजारौँ मानिसमा परीक्षणको खाँचो पर्छ । खोपलाई कोरोना भाइरसविरुद्धको एक मात्र विकल्प ठानिएको छ । विश्वभर हाल कोरोना भाइरसविरुद्धको खोप बनाउनका लागि विभिन्न टिमहरु सक्रिय छन् ।
गएको सोमबार अमेरिकी बायोटेक कम्पिनी मोदेर्नाले आफूले बनाएको खोप सुरक्षित र कोरोना भाइरसविरुद्ध प्रभावकारी रहेको देखिएको बताएको थियो ।
अहिले मानिसमा सो खोप सुरक्षित र प्रभावकारी दिएको प्रतिवेदनमा ल्यानसेटमा प्रकाशित भएको हो । सो खोप एडी५ नाम गरेको भाइरसबाट बनाइएको वैज्ञानिकले बताएका छन् । सो भाइरसलाई मानव कोशिकासँग सहकार्य गर्नका लागि जेनेटिक इन्स्ट्रक्सन दिएर परिमार्जन गरिएको उल्लेख छ ।
एडी५ ‘कोल्ड भाइरस’ हो, धेरै मानिस यो भाइरसको सम्पर्कमा आएका हुन सक्छन् । अनुसन्धानमा संलग्न आधा मानिसलाई एडी५ का लागि शक्तिशाली एन्टिबडी दिएपछि मात्रै खोप दिइएको थियो ।
ती मानिसको प्रतिरोधात्मक क्षमता बढ्न नसक्ने र खोपको प्रभाव स्पष्ट रुपमा कम देखिने गरेको डा. कसर्टन लाइकले बताइन् । उनी युनिभर्सिटी अफ मेरिल्याण्डकी भाइरोलोजिस्ट हुन् र कोरोना भाइरसविरुद्धको खोपको अनुसन्धानमा उनले नेतृत्व गरिरहेकी छन् ।
चीनका अनुसन्धानकर्ताहरुले पनि एडी५ भाइरसको एन्टिबडी रहेका व्यक्तिमा सो खोप दिएपछि बलियो प्रतिरोधात्मक क्षमता बन्ने सम्भावना कम देखिएको बताएका थिए । एडी५ को एन्टिबडी नदिइएका व्यक्तिमा भने भाइरसको प्रभाव अति राम्रो र उत्साहजनक देखिएको छ ।