धरानः सरकार विद्यालय खोल्ने विकल्प खोज्न थालेको छ । लकडाउन अझै बढ्न सक्ने संकेत देखेको सरकारले सुरक्षितरूपमा कसरी विद्यालय सञ्चालन गर्ने विषयमा गृहकार्य थालेको हो ।
शिक्षा, विज्ञान तथा प्रविधिमन्त्री गिरिराजमणि पोखरेलले स्थानीय निकायको संस्था नेपाल नगरपालिका महासंघ, प्रदेश सरकारअन्तर्गत सामाजिक विकासमन्त्री, सचिवलगायतसँग छलफल शुरू समेत गरेका छन् ।
मन्त्रालयका प्रवक्ता दीपक शर्माले थोरै विद्यार्थी भएका र गाउँ नै सेल्फ क्वारेन्टाइनजस्तो भएका गाउँका विद्यालय सञ्चालन गर्न सकिने विषयमा छलफल शुरू गरेको जानकारी दिए । उनले भौतिक दूरी कायम गरी कसरी सुरक्षितरूपमा विद्यालय खुला गर्न सकिन्छ भन्ने विषयमा छलफल गरिरहेको पनि बताए ।
मन्त्रालयले सबै शिक्षकको पीसीआर परीक्षण गर्ने, विद्यालयमा सेनिटाइजर र थर्मल गन प्रयोग गरी ताप मापन गर्ने र विद्यार्थीलाई कक्षाकोठामा दुरी कायम गर्ने गरी बस्ने वातावरण मिलाएर मात्र विद्यालय खोल्ने तयारी गरिरहेको छ ।
मन्त्रालयले चरणबद्धरूपमा छलफल गरी तयार गरेको प्रतिवेदन कोभिड–१९ उच्चस्तरीय समितिलाई बुझाएपछि सो समितिको निर्णयको आधारमा विद्यालय खोल्ने विषयमा मन्त्रालयले निर्णय गर्नेछ । शिक्षा, विज्ञान तथा प्रविधिमन्त्री पोखरेलले जेठ १४ गतेभित्र ठोस निर्णय दिने बताए । उनले अब सरकारले विकल्प खोज्नैपर्ने पनि बताए । लकडाउनका कारण चैत ६ गतेदेखि विद्यालय बन्द छ ।
निजी विद्यालयले यही अवस्था भए असारदेखि शिक्षकलाई तलब दिन समस्या पर्ने जनाएको प्याब्सन र एन–प्याब्सनले सरकारले तत्काल विद्यालय खोल्ने वातावरण तयार गर्न आग्रह गरिसकेको छ । असारदेखि शुल्क लिन नसके धेरै विद्यालय बन्द गर्नुपर्ने अवस्था आएको निजी विद्यालय सञ्चालकले बताउँदै पनि आएका छन् ।