धरानः झापामा जंगली हात्तीको आक्रमणबाट एक युवाको मृत्यु भएको छ । झापाको गौरीगञ्ज गाउँपालिका–२ लालमाटीमा जंगली हात्तीको आक्रमणबाट युवाको मृत्यु भएको हो ।
भारतीय उनको हात्ती खेदाउँदै आउँदा उनीमाथि हात्तीले आक्रमण गरेको थियो । डिभिजन वन कार्यालय झापाका प्रमुख विष्णुलाल घिमिरेले सोमबार बच्चासहित आएको माउ हात्तीको आक्रमणमा परी भारतको सिंगीमारी–६ का २५ वर्षीय साइलो मुर्मुको घटनास्थलमै मृत्यु भएको बताए ।
मोरङतिरबाट आएको हात्तीलाई नेपाली र भारतीय नागरिकले मिलेर धपाउने प्रयास गर्दागर्दै हात्तीले एक्कासी भारतीय युवकलाई झम्टेको थियो । हात्ती खेद्न सीमा नाघेर आएका ती भारतीय युवकको शव दशगजाको मकैबारीमा भेटिएको छ ।
घटनाको खबर पाएलगत्तै कोरोबारी प्रहरी चौकीबाट थप सुरक्षाकर्मी घटनास्थलमा पठाइएको जिल्ला प्रहरी कार्यालय झापाले जनाएको छ । गत साता कचनकबलमा जंगलमा निगुरो टिप्न जाँदा हात्तीको आक्रमणमा परी एक वृद्धको मृत्यु भएको थियो । रासस