सप्तरीः सप्तरीमा होम आइसोलेसनमा रहेकी एक गर्भवती महिलाको मृत्यु भएको छ ।
सप्तरीको कञ्चनरुप नगरपालिका ११ की २५ वर्षीया ती गर्भवती महिलाको मंगलबार बिहान मृत्यु भएको हो । १० दिनअगाडि नै ती महिलालाई अचानक १००.२ डिग्री ज्वरो आएको र श्वासप्रश्वासमा समस्या आएको थियो। यही ८ गते राजविराज स्थित डा. विनिता यादवको क्लिनिकमा उपचारका लागि ल्याइएपछि चिकित्सकले औषधि दिँदै होम आइसोलेसनमा रहन सल्लाह दिएका थिए ।
आइसोलेसनमा रहेकी ती महिलालाई गएराति धेरै ज्वरो आएको र श्वासप्रश्वासमा समस्या भएपछि मंगलबार बिहान मृत्यु भएको जिल्ला स्वास्थ्य कार्यालय सप्तरीका प्रमुख दुनियालाल यादवले जानकारी दिए । कोरोना संक्रमणसँग मिल्ने लक्षण देखिएको र होम आइसोलेसनमा रहँदा उनको मृत्यु भएपछि उनको स्वाब परीक्षण गर्ने तयारी भइरहेको स्वास्थ्य प्रमुख यादवले बताए ।