धरानः झापाका थप १७ जना व्यक्तिमा कोरोना भाइरसको संक्रमण पुष्टि भएको छ । यीसहित प्रदेश १ मा संक्रमितको संख्या १ सय ४ पुगेको छ ।
बुधबार झापामा १७ जना कोरोना संक्रमित थपिएका हुन् । विराटनगरस्थित कोशी अस्पतालको प्रयोगशालामा गरिएको परीक्षणमा १७ जनामा संक्रमण पुष्टि भएको अस्पतालकी डा. संगीता मिश्रले जानकारी दिइन् ।
संक्रमितमध्ये १५ जना केचनकवल गाउँपालिकाका छन् । उनीहरू भारतबाट आएर क्वारेन्टिनमा बस्दै आएका थिए । बाँकी दुई जना भने गौरादह नगरपालिकाका छन् । योसँगै कोरोना संक्रमितको संख्या ८ सय ४२ पुगेको छ ।
बुधबार बिहानै रौतहटमा ३५, बाग्लुङमा ६ र हेटौंडामा एकजना संक्रमित थपिएका हुन् । जसमा रौतहट र बाग्लुङका संक्रमित भारतबाट आएको खुलेको छ । हेटौंडाकी संक्रमित २५ वर्षीया युवती भने चितवनबाट गत जेठ ९ गते घर पुगेकी थिइन् ।
यसअघि देखिएका संक्रमितहरुको सम्पर्कमा आएका र भारतबाट आएकाहरुको स्वाब नमुना संकलन गरी विराटनगरस्थित कोसी अस्पतालको प्रयोगशालामा परीक्षण गर्दा संक्रमण पुष्टि भएको हो । प्रदेश १ का १४ मध्ये सात जिल्लामा संक्रमण पुष्टि भइसकेको छ । झापा, उदयपुर, मोरङ, सुनसरी, भोजपुर, खोटाङ र धनकुटामा संक्रमित भेटिएका हुन् ।