धरानः अब डिजेल पेट्रोल, मट्टितेल र सुनको मूल्य बढ्ने भएको छ ।
सरकारले डिजेल पेट्रोल, मट्टितेल र सुनको भन्सार महशुल बढाएसँगै मूल्य निश्चित नै बढ्ने भएको हो । बिहीबार आ.व. २०७७–०७८ को बजेट प्रस्तुत गर्दै अर्थमन्त्री डा. युवराज खतिवडाले यस्तो घोषणा गरेका हुन् ।
इन्धनमा खाना पकाउने ग्यास र हवाई इन्धनबाहेक डिजेल, पेट्रोल, मट्टितेल र सुन तथा सुनको गहनाको भन्सार महशुलमा सामान्य वृद्धि गरिएको अर्थमन्त्री खतिवडाले जानकारी दिए । फजुल खर्चमाथी नियन्त्रण जमाउँन सरकारले यस्तो व्यवस्था गरेको हो ।
इनरुवादेखि यसै वर्ष निर्माण सकिने गरी रेल
सरकारले पूर्व–पश्चिम विद्युतीय रेल निर्माणको काम अगाडी बढाउने भएको छ । भारतिय सीमादेखि सुनसरीको इनरुवासम्म यसै बर्ष निर्माण सकिनेगरी काम हुनेछ । यसैगरी नेपाली ठूला नदी हुँदै भारतको समुन्द्र हुँदै विश्वभरी नेपाली पानी जहाज चलाउनेगरी काम गर्न सरकारले बजेट विनियोजन गरेको छ ।
अर्थमन्त्री डा. खतिवडाले आगामी आर्थिक वर्ष ०७७र७८ को बजेट प्रस्तुत गर्दै यस्तो घोषणा गरेका हुन् । रेलमार्गका लागि १९ अर्ब ६६ करोड बजेट विनियोजन भएको छ । अन्तर्राष्ट्रिय विमानस्थल निर्माणका लागि ४२ अर्ब विनियोजन भएको छ । २५० पुल निर्माण गरिने, ३ सय भन्दा बढी निर्माणाधीन पुल सम्पन्न गर्न र १३०० स्थानीय पुल निर्माण गर्न १० अर्ब विनियोजन भएको छ । महाकाली नदीमा मोटरेबल पुल निर्माण सम्पन्न गर्न ८८ करोड बजेट विनियोजन भएको छ ।
हुलाकी राजमार्गका लागि ७ अर्ब ५१ करोड र मदन भण्डारी राजमार्गका लागि ३ अर्ब ७ करोड बजेट छुट्याइएको छ । मदन भण्डारी राजमार्ग ५ वर्षभित्र र हुलाकी राजमार्ग ३ वर्षभित्र निर्माण गरिसक्ने लक्ष्य छ । पूर्व पश्चिम राजमार्गलाई ३ वर्षभित्र एसियाली स्तरको बनाउने गरी १२ अर्ब २१ करोड बजेट छुट्याइएको छ । पुष्पलाल राजमार्गलाई ३ वर्षभित्र सक्न ३ अर्ब २७ करोड विनियोजन भएको छ ।