धरानः खाडी मुलुकमा लकडाउन लचिलो बनाइने भएको छ । कोरोनाको कहरकै बीचमा चहलपहल सुरु भएको छ । यसले नेपाली श्रमिकलाई फाइदा पुग्ने भएको छ । साउदी, यूएई, कुवेत, ओमान र मलेसियामा विस्तारै आर्थिक गतिविधि सुरु हुन थालेका छन् ।
सुरुवाती दिनमा कर्फ्यु नै लागेको साउदी र कुवेत पनि विस्तारै खुल्न थालेका छन् । यूएईको दुबई राज्यले पनि लकडाउन खुकुलो बनाउँदै लगेको छ भने मलेसियामा त झण्डै एक महिना अघिदेखि नै लकडाउनलाई खुकुलो बनाउँदै आर्थिक गतिविधि सञ्चालन भइरहेको छ ।
कोरोना संक्रमण रोकथामका लागि साउदीले झण्डै दुई महिने लामो कफर्यु जारी गरेको थियो । साउदीमा अहिले पनि दिनमा दुई हजारका दरले कोरोना संक्रमित बढिरहेका छन् । तर पहिलेको तुलनामा संक्रमितको संख्या घट्दो क्रममा रहेको साउदीको भनाइ छ । त्यसैले साउदीले विभिन्न चरणमा विभाजन गरेर दुई महिने लामो कडा कर्फ्युलाई खुकुलो बनाउँदै लगेको छ ।
पहिलो चरणमा मे २८ देखि ३० मेसम्म मक्का बाहेकका क्षेत्र र प्रान्तहरुबीचको आवागमनलाई बिहान ६ बजेदेखि दिउँसो तीन बजेसम्म खुलाइएको छ भने बाँकी समय लकडाउन हुने त्यहाँको आन्तरिक मामिला मन्त्रालयले जनाएको छ ।
साउदीले दोस्रो चरणमा मे ३१ देखि जुन २० सम्म मक्का बाहेकका क्षेत्र र प्रान्तहरु बिहान ६ बजेदेखि साँझ ८ बजेसम्म खुल्ला गर्ने भएको छ । यो समयमा क्षेत्र र प्रान्तबीच आउजाउ गर्न पाइन्छ । यो समयमा सरकारी कार्यालयहरुसमेत खुल्नेछन् । तर यस क्षेत्र र प्रान्तबीच चल्ने सार्वजनिक यातायातका साधनहरु भने बन्द नै रहनेछन् । रेष्टुरेन्ट, फुड र बेभरेजहरु खुल्ने भएका छन् तर पार्लर, सैलुन, खेलकुद केन्द्रहरु, जिम र हल लगायत भने दोस्रो चरणमा पनि बन्द रहनेछन् ।
तेस्रो चरणलाई जून २१ पछिको अवधिमा मानिएको छ । यस अवधिमा सरकारले आर्थिक गतिविधिका सबै क्षेत्रहरु खुला गर्ने र लकडाउन भन्दा अगाडिको ‘सामान्य’ अवस्थामा देशलाई लैजाने योजना बनाएको साउदी प्रेसलाई उल्लेख गर्दै त्यहाँ रहेको दूतावासले जनाएको छ ।
यूएईको दुबईमा पनि लकडाउन खुकुलो बनाइएको छ । दुबई सरकारले आर्थिक गतिविधि सुरु गर्ने घोषणा गरेसँगै दुबईमा जारी कफर्युलाई राति ११ बजेदेखि बिहान ६ बजेसम्म मात्रै गर्ने भएको छ । यसअघि साँझ ८ बजेदेखि बिहान ६ बजेसम्म कफर्यु लगाइएको थियो । यस्तै दुबई बिमानस्थलबाट त्यहाँको आवासीय भिसा हुनेहरु गन्तव्यमा जान तथा ट्रान्जिट भिसा हुनेहरु रोकिन सक्नेछन् । त्यस्तै सरकारी सेवाका सबै कार्यालयहरु खुला भएका छन् ।
मुखमा मास्क र हातमा ग्लोभ्स अनिवार्य लगाउनुपर्ने नियम बनाइएको छ । यो व्यवस्था तत्कालका लागि दुबई राज्यमा मात्र लागू भएको हो । यूएईका अन्य राज्यमा लागू हुनेछैन ।
कोरोना संक्रमण रोकथामका लागि कुवेतले लामो समयदेखि जारी गरेको कडा कर्फ्यु केही खुकुलो बनाएको छ । कुवेत सरकारले अब बिस्तारै समान्य अवस्थामा फर्कनका लागि कोरोना संक्रमणबाट बच्ने उपायहरु अपनाउँदै अघि बढ्ने बताएको छ । कुवेतले पाँच चरणमा विभाजन गर्दै सामान्य अवस्थामा फर्कने जनाएको छ । सबै चरणहरु तीन हप्ताका रहेका छन् । योजना अनुसारनै भएमा सेम्टेम्बर १३ देखि कुवेत फेरि पुरानै शैलीमा फर्कनसक्ने बताएको छ ।
ओमानको मस्कट गभरनेट यस क्षेत्रको लकडाउन मे २९ शुक्रबारदेखि हटाउने भएको छ । अब मस्कटका सरकारी निकायहरुमा कम्तिमा ५० प्रतिशत कर्मचारी उपस्थित हुनुपर्ने छ ।
प्रत्येक इकाईका प्रमुखले महामारीको प्रसारलाई रोक्न आवश्यक सावधानीका उपायहरु अपनाउँदै सरकारी निकायको नियमित गतिबिधि र कार्य सम्पादन गर्न सक्ने निर्णय भएको त्यहाँ रहेको नेपाली दूतावासले जनाएको छ ।
मलेसियाले मे ४ देखि नै क्षेत्रगत हिसाबमा आर्थिक गतिविधि सुरु गरेको छ । गएको मार्चदेखि नै लकडाउनमा रहेको मलेसियमा अहिले पनि लकडाउन नै छ । जुन ९ सम्म अहिले लकडाउनको अवधि तोकिएको छ । तर क्षेत्रगत हिसाबले मलेसियाले लकडाउनलाई झण्डै एक महिनाअघिदेखि नै खुकुलो बनाउँदै लगेको छ । आर्थिक गतिविधि निश्चित मापदण्ड पालना गर्दै सुरु भएका छन् । होटलहरु लगायत विभिन्न क्षेत्रमा नेपाली श्रमिकको काम फेरि सुरु भएको छ ।