फोटो : ज्ञापनपत्र बुझ्दै ताप्लेजुङ जिल्ला प्रसाशन प्रमुख दोरेन्द्र निरौला ।

ताप्लेजुङः ताप्लेजुङका दलित अगुवाहरूले रुकुम जिल्लामा नवराज विकसहित ४ जनाको हत्याको सत्यतत्य छानविनको माग गदै शुक्रबार जिल्ला प्रशासन कार्यालय तापलेजुङमार्फत् प्रधानमन्त्रीलाई ज्ञापनपत्र बुझाएको छ ।
गत जेष्ठ १० गते रुकुम जिल्लाको चौरजशारी नगरपालिका ८ मा नवराजसहित ४ जना हत्या भएको घटनाको विरोधमा ताप्लेजुङको सदरमुकाम फुङलिङमा प्रेस विज्ञप्ति जारी गरिएको छ । जाजरकोट जिल्ला भेरी नगारपालिका ४ राना गाउँ बस्ने नवराज विक र चौरजहारी नगरपालिका–४ की सुष्मा मल्लबीच प्रेम विवाह हुन नदिनलाई योजनाबद्ध हत्या गरिएको प्रेस विज्ञाप्तिमा उल्लेख गरिएको छ ।
हत्या गरिएका, घाइते र बेपत्ता परिवारलाई उचित क्षतिपूर्तिको व्यवस्था गर्न, हत्याकाण्डको सत्यतत्य छानविन लागि उच्चस्तरीय संसदीय समितिको निर्माण गरेर बाहिर ल्याएर कुनै पनि राजनितिक दबाव र प्रभावमा मुक्त भएर दोषीलाई हदैसम्मको कारबाहीको माग ज्ञापनपत्रमार्फत् प्रधानमन्त्रीलाई आग्रह गरिएको छ ।
नेपाली जनताको त्याग, तपस्या र बलिदानको जगमा मुलुक छुवाछुतमुक्त राष्ट्र घोषण भएको १२ वर्ष भएपनि अहिलेसम्म यो वा त्यो बहानामा दलित समुदायमाथि पटक–पटक भइरहेको हत्याका घटनाले शासन व्यवस्था परिवर्तन भएपनि सामाजिक संरचना, मानसिक सोच र व्यवहार आजसम्म नभएको ज्ञापनपत्रमा उल्लेख गरिएको छ । दलित समुदायलाई राजनीतिक परिर्वतन र सत्ता प्राप्तिको भरयाङको रूपमा मत्रै नलिन ज्ञापनपत्रमा भनिएको छ ।