धरानः जिल्ला प्रहरी कार्यालय सुनसरीले हत्या आरोपमा दुईजनालाई सुनसरीको बराहक्षेत्रबाट पक्राउ गरेको छ ।
शनिबार बराहक्षेत्र इक्राहीका २२ वर्षीय गणेश लिम्बू र १९ वर्षीय प्रदीप राजधामीलाई बराहक्षेत्र ३ बाङ्गेका कमल राईको हत्या आरोपमा पक्राउ गरेको प्रदेश १ प्रहरी कार्यालय विराटनरका प्रहरी नायब उपरीक्षक सुमन तिम्सिनाले बताए ।
प्रहरी नायब उपरीक्षक तिम्सिनाका अनुसार सुनसरी प्रहरीले शुक्रबार बिहान बराहक्षेत्र इक्राहीको जमुनाकित्तास्थित प्लटिङ गरिएको खुला जमिन ३७ वर्षीय राई मृत अवस्थामा फेला पारेको थियो ।
घटनाको प्रारम्भिक अनुसन्धानमा मृतक राईको टाउको तथा शरीरमा चोट देखिएपछि हत्याको आशंकामा प्रहरीले अनुसन्धान सुरु गरेको उनले बताए । अनुसन्धानका क्रममा पक्राउ परेका दुवैजनाले पूर्व रिसिइबीका कारण लाठीले मृतक राईको टाउको र शरीरको संवेदनशील भागमा निर्घात कुटपिट गरेको स्वीकार गरेका छन् । सोही कुटपिटका कारण उनको मृत्यु भएको सुनसरी प्रहरीले जनाएको छ । हाल पक्राउ परेका दुवैजनामाथि थप अनुसन्धान भइरहेको प्रहरीले जनाएको छ ।