विराटनगरः विराटनगरका व्यवसायीले सुरक्षाका विधि अपनाउँदै भएपनि कम्तीमा चार घण्टा व्यवसाय सञ्चालन गर्नुपर्ने निष्कर्ष निकालेका छन् ।
मोरङ व्यापार संघको आयोजनामा भएको व्यवसायीको भेलाले सबै प्रकारका व्यवसाय दैनिक कम्तीमा चार घण्टा सञ्चालन हुनुपर्ने निष्कर्ष निकालेको हो । भेलामा नेपाल कपडा व्यवसायी संघ, हार्डवेयर एसोसिएसन, मोरङ इलेक्ट्रिक संघ, खुद्रा व्यापार संघ, नेपाल सुन–चाँदी व्यवसायी संघ, मोरङ अटोमोबाइल डिलर्स एसोसिएसन लगायतका वस्तुगत संघका प्रतिनिधि सहभागी थिए ।
भेलामा मोरङ व्यापार संघका अध्यक्ष प्रकाश मुन्दडाले मुलुकमा उत्पन्न भएको आर्थिक संकट न्यूनीकरण गर्न र देशको अर्थतन्त्रसमेत चलायमान राख्न अबका दिनमा स्वास्थ्य–सुरक्षाका नीतिलाई अनिवार्य अवलम्बन गरी महिनौं दिन देखि बन्द रहेका उद्योग, व्यवसाय र बजार संचालन गर्नुपर्ने धारणा राखे ।
उनले लामो समयदेखि ठप्प रहन पुगेका उद्योग, कलकारखाना, व्यवसाय र बजारका कारण आम उपभोक्ताको जनजीवन कष्टकर हुनुका साथै उद्योगी व्यवसायी ठूलो आर्थिक संकटको भुमरीमा परेको धारणा प्रकट गरेका थिए ।