धरानः बीपी कोइराला स्वास्थ्य विज्ञान प्रतिष्ठानले अब इन्टरनेटकै माध्यमबाट भएपनि उपचार सेवा शुरु गरेको छ ।
उपकुलपति प्राडा ज्ञानेन्द्र गिरीले लकडाउनको कारण ओपिडी सेवा रोकिएर उपचारको लागि आउन नपाएका बिरामीलाई स्वास्थ्य सेवा उपलब्ध गराउने अवधारणा अनुसार अनलाइन चिकित्सा सेवा सन्चालनमा ल्याएको बताए ।
‘अस्पतालमा संक्रमणको जोखिम उच्च हुने भएकाले अस्पताल नआइ नहुने बिरामी बाहेकका लागि यो सेवा निकै प्रभावकारी हुनेछ भन्ने विश्वास छ ।’ उनले भने । अब बिरामीले घरमै बसेर चिकित्सकहरूसँग प्रत्यक्ष संवाद गरी स्वास्थ्य सेवा, परामर्श लिन पाउनेछन् । यो सेवा लिनको लागि वीपी प्रतिष्ठानको वेबसाइट http:telemedicine.bpkihs.edu मा गएर बिरामीले व्यक्तिगत विवरण भर्नुपर्ने हुन्छ । त्यहाँ विरामीले आफुलाई सहज हुने किसिमको संचार सेवा (टेलिफोन, स्काईप, भाइबर, हवाट्सयप) छान्न पाउने छन् ।
चिकित्सक र बिरामीबीचमा भिडियोबाट समेत संवाद गर्न सकिने हुँदा फोनमा व्याख्या गर्न नसकिएका कुरा पनि हेर्न सकिने हुनाले प्रभावकारी हुने प्रतिष्ठानले जनाएको छ ।