धरानः इटहरी उप–महानगरपालिका–२० मा एक युवाको हत्यामा संलग्न तीनजना अहिले प्रहरी कार्यालयमा छन् । उनीहरूलाई प्रहरीले सार्वजनिक गरेको छ ।
गएको आइतबार राति करिब सवा ९ बजे आपसी विवादका क्रममा २८ वर्षीय रादन राईको कुटपिट तथा छुरा प्रहार गरी हत्या गरेको आरोपमा २० वर्षीय प्रज्वल तामाङ कानेपोखरी, १९ वर्षीय अभिषेक केसी (गिरी) इटहरी र २३ वर्षीय अमित घिमिरे इटहरी अहिले इलाका प्रहरी कार्यालय इटहरीमा छन् ।
जेष्ठ १८ गते राती करिव सवा ९ बजेको समयमा छिमेकी ‘खिले’ भनिने अमित घिमिरेको घरमा प्रज्वल राई र रादन राईबीच सामान्य विवाद भएको र विवादपछि मृतक राई आफ्नो घरतर्फ फर्कने क्रममा बाटोमा ढुकेर बसेका समूहले बाँसको लाठीले अन्धाधुन्द कुटपिट गर्नुका साथै धारिलो हतियार छुराले कोखा तथा छातीमा प्रहार गरी घाइते बनाएका थिए ।
घाइतेका अन्य साथीहरुले थाहा पाइ घाइतेलाई तत्काल उद्धार गरी उपचारको लागि धरानस्थित बीपी प्रतिष्ठान लगेका थिए । प्रतिष्ठानमा उपचारको क्रममा मृत्यु भएको थियो ।
बेलायतबाट तीन महिनाको बिदामा घर आएका राईलाई विवादपछि राति घर फर्कने क्रममा तीनैजनाले आक्रमण गरेका थिए । राईका अन्य साथीले हो–हल्ला गरेपछि तीनैजना फरार भएका थिए ।
प्रदेश १ प्रहरी कार्यालय विराटनगरका प्रवक्ता एवं प्रहरी नायब उपरीक्षक सुमनकुमार तिम्सिनाले मृतक परिवारसहित बेलायतमा बस्दै आएका र लकडाउनका कारण रोकिएको बताए । ३ महिनाअघि यहाँ आएका उनको लकडाउनले नै भिषा, हवाई टिकट रद्द भएको थियो । उनी तरहरा स्थीत घरमै बसिरहेका थिए । २० वर्षीय प्रज्वल कक्षा–१२ मा अध्ययनरत विद्यार्थी हुन् । १९ वर्षीय अभिषेक गिरी कक्षा–११ मा अध्ययनरत थिए भने २३ वर्षीय अभिषेक पौडेल कक्षा–१२ मा अध्ययनरत् रहेका थिए ।