काठमाडौंः यातायात व्यवस्था कार्यालय कोशी (इटहरी) मा ४० करोड रूपैयाँ बढी भ्रष्टाचार भएको ठहरसहित अख्तियार दुरुपयोग अनुसन्धान आयोगले मुद्दा दर्ता गरेको छ ।
अख्तियारले १७ जनाविरुद्ध ४० करोड ७३ लाख ५० हजार ४ सय ३० रुपैयाँ बिगो मागदाबीसहित भ्रष्टाचार मुद्दा दर्ता गराएको छ । यातायात व्यवस्था कार्यालय (सवारी) कोशीका तत्कालीन कार्यालय प्रमुख नयराज नेपालसहित १७ जनाविरुद्ध राजस्व रकम हिनामिना अभियोगमा अख्तियारले आइतबार भ्रष्टाचार मुद्दा चलाएको हो । १७ जनाविरुद्ध आइतवार विशेष अदालतमा मुद्दा दायर गरेको हो ।
अख्तियारले उनीहरुलाई भ्रष्टाचार निवारण ऐन, २०५९ वमोजिम कैद सजाय र जरिवाना एवम् बिगो असुल गर्न मागदाबी लिई आरोपपत्र दायर गरेको प्रवक्ता प्रदीप कोइरालाले जानकारी दिए । तत्कालीन कार्यालय प्रमुखहरु नयराज नेपाल, तीर्थराज लम्साल, गोपाल थपलिया र भुपेन्द्र राईसहित १७ जनाविरुद्ध भ्रष्टाचार मुद्दा चलाएको हो । मुद्दा चलाइएकामध्ये अधिकांशसँग करोडभन्दा धेरै बिगो माग गरिएको छ ।
कसलाई कति बिगो ?
आर्थिक वर्ष २०७३–०७४ को २०७३ चैतदेखि २०७४ असारसम्मको संकलित राजस्व दाखिला नगरेको अभियोग अख्तियारको छ । अख्तियारले नेपालविरुद्ध एक करोड आठ लाख २९ हजार ६९ रुपैयाँ बिगो कायम गरेको छ । यस्तै, तत्कालीन कार्यालय प्रमुख तीर्थराज लम्सालविरुद्ध तीन करोड ३० लाख ७९ हजार ३७३ रुपैयाँ बिगो कायम गरेको छ । तत्कालीन कार्यालय प्रमुख गोपाल थपलियाविरुद्ध अख्तियारले एक करोड ३० लाख ७२ हजार १५३ रुपैयाँ बगो कायम गरेको छ । अर्का तत्कालीन कार्यालय प्रमुख भूपेन्द्र राईसँग ५६ लाख १२ हजार ५४७ रुपैयाँ बिगो अख्तियारले कायम गरेको छ ।
अभियोगपत्र अनुसार तत्कालीन लेखा अधिकृत टीकाराम अधिकारीसँग एक करोड २५ लाख ४८ हजार ६ रुपैयाँ बिगो माग गरिएको छ । तत्कालीन लेखापाल सुरेश अधिकारीलाई तीन करोड ७२ लाख ४४ हजार ७५५, तत्कालीन लेखापाल रुद्रप्रसाद दाहालसँग तीन करोड ४८ लाख ९३ हजार २१६, तत्कालीन लेखापाल अर्जुन भट्टराईसँग दुई करोड १७ लाख ३२ हजार ४७३ रुपैयाँ र तत्कालीन लेखापाल कृष्णप्रसाद कट्टेलसँग ७३ लाख ६२ हजार ५४५ रुपैयाँ बिगो कायम गरिएको छ ।
यस्तै, कम्प्युटर अपरेटर सुजन राई २२ लाख ४४ हजार ३३६, कम्प्युटर अपरेटरहरु राकेश रोशन मगर, रमेश पौडेल, भूमिराज अधिकारी र हरिमदन ढुंगेलसँग जनही पाँच करोड ९४ लाख ९८ हजार ९३१ रुपैयाँ बिगो माग गरिएको छ ।