धरानः नेपाल सुनचाँदी व्यवसायी महासंघले सुन बेच्न चाहने सबै ग्राहकहरुको सुन किन्न नसक्ने जनाएको छ । बजारमा सुनचाँदीको भाऊ निकै बढसँगै सुनका गहनाहरू बेच्न आउनेको घुइँचो लागेपछि महासंघले विज्ञप्ती जारी गरी सबै ग्राहकको सुनको फिर्ता बिक्री गर्न आएमा बजारले धान्न नसक्ने स्पष्ट पारेको हो ।
कोरोनाको कारण अन्तर्राष्ट्रिय मुद्रासँग नेपाली मुद्राको अवमूल्यन भएको तथा सुनमा लाग्दै आएको भन्सार राजश्व वृद्धि भएका कारण सुनको मूल्य बढेको उल्लेख गर्दै महासंघले ग्राहकहरुलाई धैर्यधारण गर्न आहवान गरेको छ । साथै सरकारलाई नीतिगत निर्णय गरी व्यवसायीहरुलाइ सहयोग गर्न आग्रह समेत गरेको छ ।
। आज सुन प्रतितोला ८९ हजार ७ सय रुपैयाँमा कारोबार भइरहेको छ । हिजो सुनको मूल्य ८९ हजार ६ सयले कारोबार भएको थियो । त्यस्तै तेजावी सुन तोलाको ८९ हजार २ सय ६५ मा कारोबार भइरहेको छ । त्यसैगरि चाँदीको मूल्य आज तोला ९२५ मा कारोबार भइरहेको नेपाल सुनचाँदी व्यवसायी महासंघले जनाएको छ ।लकडाउन खुल्नेबित्तिकै उच्च मूल्यवृद्धि भएपछि यतिबेला सुनको फिर्ता बिक्री बढ्न थालेको हो । तर बिक्री भने यतिबेला ठप्पप्राय छ ।
सामान्यतया सुन किन्ने व्यक्तिले किनेकै पसलमा सुन बेच्न लगेमा त्यस्तो सुन किनिदिने गरेका थिए । तर भीड बढ्न थालेसँगै महासंघले यो अवस्था नरहेको जनाएको हो ।