सुनसरीः सुनसरीमा प्रहरीको भेषमा प्रहरी हुँ भन्दै रकम असुल गरेको पाइएको छ ।
सादा पोशाकको प्रहरी हुँ भन्दै व्यापारीहरूसँग रकम असुली गर्ने एकजनालाई प्रहरीले पक्राउ गरेपछि यो रहस्य बाहिरिएको हो ।
जिल्ला प्रहरी कार्यालय सुनसरीले उनलाई पक्राउ गरिसकेको छ । जिल्लाको हरिनगर गाउँपालिका–२ मा रहेका केही व्यापारीहरुलाई विभिन्न डर त्रास देखाइ गैर कानुनीरूपमा रकम असुली गरिरहेको भन्ने सूचना प्राप्त भएसँगै मङ्गलबार दिउँसो प्रहरी चौकी भुटाहाबाट खटिएको प्रहरी टोलीले हरिनगर गाउँपालिका–५ का २३ बर्षीय असरार अहमद मियाँलाई पक्राउ गरेको हो । यसरी प्रहरीको बदनाम गरी स्थानीय ब्यापारीहरूसँग गैर कानुनी तवरले रकम असुली गर्ने मियाँको सम्बन्धमा थप अनुसन्धान भइरहेको कार्यालयले जनाएको छ ।
१ नम्बर प्रदेश प्रहरी कार्यालय विराटनगरका सूचना समन्वय अधिकृत र प्रहरी प्रवक्ता प्रहरी उपरीक्षक दीपक पोखरेलका अनुसार उनले रकम असुलेको भन्ने विषयमा विभिन्न व्यवसायीले फोनमा गुनासो गर्दै आएका थिए ।