ताप्लेजुङः ताप्लेजुङको फुङलिङ नगरपालिकाका किसानले पहिलो पटक जैतुन खेती परीक्षण शुरू गरेका छन् ।
राम्रो बजार मूल्य पाउने र धेरै उपयोगी तेलको रूपमा चिनिँदै आएको जैतुन खेती फुङलिङ नगरपालिका–२ तारिबुङ र वडा नं. ३ मेदिबुङका किसानले परीक्षण लागि खेती शुरू गरेका हुन् ।
जैतुनको खेतीबाट राम्रो आम्दानी गरेको देखेर ताप्लेजुङका केही किसानले पहिलोपल्ट खेती गर्न लागेको हो । फुङलिङ नगरपालिका–२ तारिबुङका सुवास घिसिङ, वडा नं. ३ का देवराज पालुङ्वा, दयाराम घिमिरेसहित चारजना किसानले खेती शुरू गरेका हुन् ।
बाग्लुङ जिल्लाबाट नेपाली जैतुनको बिरुवा ल्याएर एक वर्ष अघिदेखि खेती शुरू गरेको तारिबुङका किसान घिसिङले जानकारी दिए । बाग्लुङबाट प्रति विरुवा आठ सयको दरले एक सय विरुवा खरिद गरी ल्याएर ताप्लेजुङमा परीक्षण खेती शुरू गरेको घिसिङले बताए । अन्य तीनजना किसानले पनि एक सय विरुवा ल्याएर खेती शुरू गरेका छन् ।
एक हजार ५०० देखि दुई हजार बढीको उचाइसम्ममा खेती गर्न सकिने भएकाले आपूmहरूले लगाएको जैतुन खेती फस्टाउनेमा विश्वस्त रहेकोसमेत उनीहरूको भनाइ छ । जैतुनको विरुवा रोपेको तीन वर्षदेखि फल लाग्ने र यसको तेल विभिन्न औषधिमा प्रयोग हुने घिसिङले बताए ।
जैतुनबाट उत्पादित तेल प्रति लिटर तीन हजारदेखि चार हजार रूपैयाँसम्ममा बिक्री हुने भएकोले ताप्लेजुङमा खेती परीक्षण सफल भयो भने एउटा राम्रो आम्दानीको स्रोत बन्न सक्ने घिसिङले बताए ।