ताप्लेजुङः सिरिजंघा गाउँपालिकाको नीति तथा कार्यक्रममा रोजगारी सृजना, स्वास्थ्य र शिक्षालाई प्राथमिकता दिएर बजेट प्रस्तु गरेको छ ।
स्थानीयस्तरमा रोजगारी सिर्जना गरी गरिबी न्युनीकरण गर्ने उद्देश्यले ‘अध्यक्ष रोजगार कार्यक्रम’ सञ्चालनमा ल्याइने भएको छ । यस कार्यक्रमअन्र्तगत गाउँपालिका क्षेत्रभित्र जनसहभागिता परिचालनमार्फत् सञ्चालन गरिने आयोजनाको लागत अनुमान तयारीकै बखत कम्तीमा ५० प्रतिशत स्थानीय श्रम मात्र प्रयोग हुने गरी आयोजनाको लागत अनुमान तयारी गर्ने व्यवस्था मिलाइने छ ।
जसले रोजगारीको अवसर प्रदान गरी गरिबी न्युनिकरणमा ठूलो मद्दत पुग्ने गाउँपालिकाको विश्वास छ । यस्तै, कृषि उपजमा गाउँपालिकालाई आत्मनिर्भर बनाउँन र कृषकको आयआर्जनमा वृद्धि गर्न सिरिजंघाको सान, उद्यमशिल किसान नामक कार्यक्रम सञ्चालनमा ल्याइने भएको छ । यसका लागि पालिकाभित्रका सबै टोलमा त्यहाँको भूगोल, हावापानी पहिचान गरि सुहाउँदो कृषिजन्य उत्पादनमा जोड दिइने छ भने ति उत्पादनको बजारीकरणका लागि पालिकाको केन्द्र तेल्लोकस्थित हेलिप्याडमा प्रत्येक हप्ता कृषि बजारको आयोजना गर्ने वातावरण मिलाइने छ ।
यस्तै पालिकाभित्र पर्र्ने कन्चनजंघा पालिकाको गौरवको क्षेत्रको रुपमा स्थापित गरिएको र यस हिमशिखरको पर्यटन रोयल्टी बाँडफाँड बापत प्राप्त हुने सम्पूर्ण रकम गाउँपालिकालाई उपलब्ध गराइदिन नेपाल सरकारलाई अनुरोध तथा जोडदार माग गरिने भएको छ ।
कोभिड १९ का कारण वैदेशिक रोजगारबाट फर्किएकालाई लक्षित गरी स्थानीयस्तरमा नै उद्यमशील गराउन गाउँमै रोजगार, गर्वको आधार नामक कार्यक्रम बनाइ प्रत्येक वडामा ५ लाख रुपैयाँका दरले ८ वटै वडामा ४० लाख रुपैयाँ बराबरको रकम वडास्तरमै रकम विनियोजन गरिने छ ।
यस्तै, निःशुल्क शिक्षा, हामी सबैको इच्छा नामक अभियानको थालनी समेत गरिने गाउँपालिकाले जनाएको छ । यस कार्यक्रमअन्र्तगत पालिकाभित्र पर्ने हरेक सामुदायिक विद्यालयमा कक्षा–११ र १२ मा अध्ययन गर्ने सम्पूर्ण विद्यार्थीलाई निःशुल्क पठनपाठनको व्यवस्था मिलाइने र पठनपाठनको नाममा शुल्क लिने विद्यालयलाई कारबाहीको दायरामा ल्याइने छ । स्थानीय लिम्बू समुदायको भाषा संरक्षणका लागि इच्छुक विद्यार्थीलाई लक्षित गरि स्वीकृत कार्यविधि बमोजिम प्रत्येक वडाभित्रका सामुदायिक विद्यालयमार्फत् भाषा र लिपी संरक्षण गर्ने कार्यक्रमलाई समावेश गरिने भएको छ ।
कोभिड १९ को नियन्त्रण तथा रोकथामका लागि प्रत्येक वडामा ९ लाखका दरले ७२ लाख वडास्तरमै विनियोजन समेत हुने भएको छ । यस्तै मैले तिरेको कर गाउँपालिकाको भर अभियान समेत कार्यान्वयनमा ल्याइने छ भने यस अभियानमार्फत् सबै भन्दा बढी करदातालाई सम्मान गर्ने लगायतका कार्यक्रम सञ्चालन गरिने छ ।
कार्यालयको काम अह्राएर मात्र होइन, मन पराएर पनि गर्ने संस्कारको विकास गरिने छ । यसका लागि उत्कृष्ट र रचनात्मक कार्यसम्पादन गर्ने कार्यालय मातहत, वडाका साथै सामुदायिक विद्यालयका कर्मचारीलाई छनौट गरी एकजना सर्वोत्कृष्ट र दुईजना उत्कृष्टलाई सम्मान गरिने छ । सूचनाको हकलाई मध्यनजर गर्दै हरेक वडाको आ–आफ्नै वेवसाइट निर्माण गरी वडाका गतिविधि सो मार्फत् सार्वजानिक गर्ने बातावरण बनाइने भएको छ ।
पालिकाभित्रका कक्षा–१२ वा सो भन्दा माथिल्लो शैक्षिक योग्यता हासिल गरेका इच्छुक युवाहरूलाई लक्षित गरी पत्रकारिता सम्बन्धी आधारभूत तालिम समेत दिईने नीति तथा कार्यक्रममा उल्लेख छ । पालिकाले पारित गरेका नीति तथा कार्यक्रमले पालिकाभित्रको समग्र विकासमा योगदान दिने विश्वास गर्दै यसको प्रभावकारी कार्यान्वयन र पारदर्शितामा ध्यान दिन सरोकारवाला सबै पक्षलाई पालिका अध्यक्ष गुरुङले आग्रह गरे ।
यसैबीच गाउँपालिकाको आगामी उद्देश्य र प्राथमिकतालाई सम्बोधन गर्दै आर्थिक वर्ष २०७७–७८ का लागि ४३ करोड ६५ लाख बराबरको बजेट समेत प्रस्तुत गरिएको छ । पालिकाले आर्थिक वर्ष २०७७–७८ का लागि तय गरेको बजेट, नीति तथा कार्यक्रमले पालिकाभित्रका नागरिकको जीवनस्तर उकास्न साथै समग्र विकासमा सहयोग पुग्ने देखिएको गाउँपालिकाका प्रशासकीय अधिकृत सन्तोष घिमिरेको भनाई छ ।