ताप्लेजुङः मिक्वाखोला गाउँपालिको सातौं गाउँ सभाले अध्यक्ष कृषि आयोजना संञ्चालन गर्ने नीति तथा कार्यक्रम पहिलो प्राथमिता दिएको छ ।
अध्यक्ष कृषि आयोजना मिक्वाखोला गाउँपालिकाको स्थानीय गौरवको आयोजनाको रुपमा सञ्चालन गरिने भएको छ । मिक्वाखोला गाउँपालिका मुख्य आर्थिक स्रोत तथा रोजगारी अवसर प्रदान गर्ने भएको छ । यो आयोजना बहुआयामिक बहुवर्षे आयोजनाको रुपमा संञ्चालन हुने छ । यस आयोजना अन्तर्गत समुदायको मागमा कार्यक्रम सन्चालन हुने गरी रु १५ लाख विनियोजन गरिने छ ।
बैराखुदेखि किलिङसम्म माथिल्लो भेगमा ‘१ घर १० ककखर’ कार्यक्रम मार्फत कम्तिमा ५०० परिवारलाई दाँते ककखरको कलमी विरुवा प्रदान गरिने भएको छ ।
थुम्मा देखि खान्दाङसम्म तल्लो भेगमा ‘१ घर २० घ्यूफल’ को उन्नत विरुवा उपलब्ध गराइनेछ । थुम्मादेखि खान्दाङसम्म तल्लो भेगमा ‘१ घर १०० भुइँकटर’ कार्यक्रममार्फत कम्तीमा २५० घर परिवारलाई विरुवा उपलब्ध गराइनेछ । हरेक वडामा कम्तीमा एक एक वटा टर्कीपालन र बाख्रापालन फार्महरु सञ्चालन गरिनेछ । त्यस्ता फार्महरु सञ्चालन गर्नका लागि उन्नत नश्लहरू अनुदानमा उपलब्ध गराइनेछ ।
माथिल्लो भेगलाई आलुखेतीको पकेट क्षेत्र घोषणा गरी आलु खेती प्रवद्र्धन गरिनेछ । बेसार अदुवा र लसुन जस्ता कृषिउपजहरुको उत्पादन वृद्धि गर्न विशेष अभियान चलाइनेछ । व्यावसायिक ट्राउट र असला माछा पालन तथा सिताके च्याउ खेती प्रवद्र्धन गरिनेछ । अनुदान वितरण गर्दा एक घर एक अनुदानको नीति लागू गरिनेछ, अनुदानमा विरुवा प्राप्त गर्ने कृषकले बिरुवाको उचित स्याहार नगरेमा अर्को वर्षको अनुदान कार्यक्रमबाट बञ्चित हुने छ ।