धरानः धरानका सामुदायिक वन उपभोक्ता समितिहरू पर्यटक बढाउने कार्यक्रममा लागेका छन् । उनीहरू आ–आफनो संरक्षणमा रहेका वनमा यस्तो कार्यक्रम सञ्चालन गर्दै आएका छन् । धरान–१९ स्थित हरियाली सामुदायिक वन उपभोक्ता समूहले व्यवस्थित वनभोजस्थलका रूपमा ‘हरियाली पार्क’ को विकास गर्दै अघि बढिरहेको छ ।
अहिले पार्कलाई व्यवस्थित गर्न स्थानीय लागिपरेका छन् । समूहका अध्यक्ष रामकुमार राईका अनुसार प्रदेश सरकारको वन तथा पर्या पर्यटन मन्त्रालयबाट छुट्टिएको २० लाख रूपैयाँ बजेटबाट पार्कलाई व्यवस्थित गरिएको छ । ‘पार्क व्यवस्थित गर्न रेलिङसहितको बाटो बनाउन २० लाख र पार्कभित्र रहेका वन्यजन्तु संरक्षण तथा उद्दारका लागि ६ लाख बजेट छुट्टिएको थियो’, उनले भने, ‘अहिले निर्माण कार्य सकिएको छ ।’
नेकपाका स्थानीय नेता सन्त तेम्बेका अनुसार शनिबार प्रदेश १ का सभामुख प्रदीप भण्डारी, सांसद उमिता बराइली, सावित्री श्रेष्ठको उपस्थितिमा सो रेलिङको उद्घाटन गरिएको छ । यसले पार्क व्यवस्थित बनेको उनले बताए । अहिले त्यहाँ पार्कभित्र टालीसहितको रेलिङ निर्माण सप्पन्न भएको बताए । ‘यसले आन्तरिक तथा बाह्य पर्यटकका लागि फाइदा पुग्नेछ ।’ उनले भने । यसरी नै हरियाली सामुदायिक वनले पनि ५० लाख रुपैयाँभन्दा बढी खर्च गरेर चिल्डेन पार्क, मिनी चिडियाखाना र व्यवस्थित वनभोज घरको निर्माण भइसकेको छ । हरियालीमा धारा र बिजुलीको पनि व्यवस्था छ ।
हरियालीले त्यहाँ जाने वनभोज समूहलाई ‘रोष्ट ओभन’ (सेकुवा पोल्ने चुलो) समेत उपलब्ध गराउँदै आएको छ । वनभोज टोलीलाई उनीहरूको रोजाइका आधारमा स्थान उपलब्ध गराइन्छ । त्यसबापत केही शुल्क पनि लिने गरेको छ । वनभोजबाहेक घुम्न जानेका लागि प्रवेश शुल्क तोकिएको छ । पार्कभित्रै रहेको बाल उद्यान प्रयोग गरेबापत छुट्टै शुल्क लिने गरिएको छ ।
कात्तिकदेखि वैशाखसम्म वनभोजमा आउनेहरूको घुइँचो लाग्ने गरेपनि अहिले कोरोनाका कारण पार्क बन्द रहेको उपाध्यक्ष हरिबहादुर तामाङले जानकारी दिए ।

यसअघि पार्कमा रेलिङसहितको बाटो निर्माण गरिँदै ।