ताप्लेजुङः कोरोना सङ्क्रमणका दृष्टिले अहिलेसम्म सुरक्षित रहेको ताप्लेजुङमा बुधबार पहिलोपटक एकजना पिसीआर रिपोर्ट पोजेटिभ भएका व्यक्ति फेला परेका छन् ।
साउदी अरबबाट फर्किएका सिरिजङ्घा गाउँपालिकाका ती युवा ज्वरोसहितका समस्याका कारण उपचारका लागि जिल्ला अस्पतालको फिवर कक्षमा भर्ना भएका थिए । विभिन्न देशबाट फर्किएर क्वारेन्टाइनमा बसेका नागरिक र शङ्कास्पद गरी २० जनाको स्वाब सोमबार सङ्कलन गरी परीक्षणका लागि पठाइएकोमा ती व्यक्तिको पिसीआर रिपार्ट भने पोजेटिभ आएको हो ।
यसअघि दुईजनाको आरडीटी रिर्पोट पोजेटिभ आएपनि पछि पिसीआर परीक्षण गर्दा रिर्पोट नेगेटिभ आएको थियो । यसअघि ताप्लेजुङमा १ सय ५२ जनाको पिसीआर परीक्षण गरिएकोमा सबैको रिपार्ट नेगेटिभ आइसकेको छ । परीक्षण लागि २० जनाको स्वाब पठाइएकोमा एकजनाको पिसीआर रिपार्ट पोजेटिभ आएपछि १ सय ७१ जनाको पिसीआर रिपोर्ट भने नेगेटिभ आएको छ ।
पिसीआर रिपोर्ट पोजेटिभ आएका व्यक्तिलाई उपचारका लागि मेची अञ्चल अस्पताल झापा वा मोरङको गोठगाउँस्थित केन्द्रमा पठाउनेबारे छलफल भइरहेको स्रोतले जानकारी दिएको छ । पिसीआर पोजेटिभ आएको बारे कोभिड–१९ नियन्त्रण जिल्ला समितिले भने अहिलेसम्म औपचारिक केही जानकारी दिएको छैन ।
यसअघि भारतबाट फर्किएर झापाको बुद्धशान्ति र सुनसरीको भोक्राहास्थित क्वारेन्टाइनमा रहेका बेला गरिएको परीक्षणमा ताप्लेजुङमा ४ जना कोरोना संक्रमित फेला परेपनि ताप्लेजुङमै पिसीआर परीक्षण रिपार्ट पोजेटिभ आएको भने यो पहिलोपटक हो । यसअघि झापाको बुद्धशान्ति र सुनसरीको भोक्राहास्थित क्वारेन्टाइनमा फेला परेका ताप्लेजुङका कोरोना संक्रमित भने निको भएर घर फर्किसकेका छन् ।