विराटनगरः विराटनगरमा राति स्कुटर अनियन्त्रित भएर दुर्घटना हुँदा युवाको मृत्यु भएको छ ।
बिहीबार राति करिब साढे ११ बजे विराटनगर महानगरको रानीमा स्कुटर अनियन्त्रित भएर दुर्घटना हुँदा २३ वर्षीय प्रशान्त बस्नतेको मृत्यु भएको जिल्ला प्रहरी कार्यालयले जनाएको छ ।
प्रहरीका अनुसार राती सडकमा गुडिरहेको लु४६प ६३९० नम्बरको स्कुटर अनियन्त्रित भएर दुर्घटना हुँदा गम्भीर घाइते भएका बस्नेतको उपचारका क्रममा शुक्रबार नोवेल शिक्षण अस्पतालमा मृत्यु भएको हो ।
इलाका प्रहरी कार्यालय रानीका प्रहरी निरीक्षक दीपक थापाका अनुसार घाइते बस्नेतको उपचारका लागि न्यूरो अस्पताल लगिएको थियो । तर त्यहाँ उपचार सम्भव नभएपछि नोबेल लगिएको थियो । उपचारकै क्रममा महानगर १६ का बस्नेतको नोबेलमा बिहान करिब ४ बजे मृत्यु भएको हो ।
यस्तै, मोरङको बेलबारी नगरपालिका–९ घर भई विराटनगर महानगरपालिका–१९ मा बस्दै आएका २५ वर्षीय कान्छा चौधरीको करेन्ट लागेर मृत्यु भएको छ ।
बिहीबार राति साढे १० बजे सुत्नको लागि झुल लगाउने क्रममा अचानक करेन्ट लागेर घाइते भएका चौधरीको उपचारको क्रममा नोबेल अस्पताल विराटनगरमा मृत्यु भएको जिल्ला प्रहरी कार्यालय मोरङले जनाएको छ । घटना सम्बन्धमा थप अनुसन्धान भइरहेको छ ।