धनकुटाः आफूले लगाएको बालीनाली बाँदरले खाएर सखाप बनाइ धेरै स्थानका किसानहरू बसाई सर्न बाध्य भइरहेको बेला धनकुटाको पाख्रीवास नगरपालिका १ सान्नेका युवाहरूले बाँदर धपाउने यन्त्र ‘बाँदरे तोप’ बनाएका छन् ।
२५ वर्ष उमेर समूहका युवाहरु गोपाल थापा, दीपक अधिकारी, मजनुदिन खान र मनिषा थापाले बाँदर धपाउने यन्त्र बाँदरे तोप बनाउन थालेका हुन् । गएको १ हप्तादेखि यो यन्त्र वनाउन थालेका उनीहरूले अहिलेसम्म २० थान बनाएको बताएका छन् । बनाइएका सबै यन्त्र बिक्री पनि भइसकेको गोपाल थापाले बताए ।
महालक्ष्मी नगरपालिकाका लेखनाथ पौडेलको हौसला र सल्लाह अनुसार आफूहरुले यो यन्त्र बनाउन थालेको उनीहरूले बताएका छन् । पौडेलले यो यन्त्र बनाउन हौसला दिएपछि यसअघि यस्तै यन्त्र बनाइरहेका अन्य स्थानका साथीहरूबाट फोनमार्फत् कुरा गरी सिकेर बनाउन शुरु गरेको थापाको भनाई छ । यो यन्त्र पाइप, लिक्विड, कार्वन लगायतका सामाग्रीबाट बन्ने थापाले बताए । यसले बाँदर, दुम्सी, सलह जस्ता जीवजन्तु धपाउन मिल्ने जनाइएको छ ।