धरानः धरानमै पनि व्यापक मानसिक स्वास्थ्य सचेतना आवश्यक रहेको बीपी कोइराला स्वास्थ्य विज्ञान  प्रतिष्ठानका डाक्टर मधुर बस्नेतले बताएका छन् ।
लायन्स एण्ड लियो क्लब अफ दन्तकाली धरानको आयोजना र जुनियर जेसिज धरानको सहआयोजनामा भएको ‘मानसिक स्वास्थ्य सचेतना’ कार्यक्रममा उनले सो कुरामा जोड दिएका हुन् ।
उनले मानसिक स्वास्थ्यको क्षेत्रमा सरकारको प्राथमिकता नदेखिएको पनि बताए । उनले स्वास्थ्यका अरु क्षेत्रमा जस्तै मानसिक स्वास्थ्यलाई प्राथमिकतामा राख्न जोड दिए । ‘सरकारले पहिलेको तुलनामा मानसिक स्वास्थ्यमा केही त गरेको छ तर पर्याप्त भने छैन । यसका लागि अब सबै पक्ष मिलेर काम गर्नु जरुरी छ’ उनले भने ।
उनले विशेषगरी १४ देखि २४ वर्ष उमेर समूहका युवाहरूमा मानसिक स्वास्थ्यको विषयमा जानकारी लिन आवश्यक रहेको धारणा राखे । ‘सो उमेर समूहकाहरू पढाइ, जागिर, घरपरिवार, वैदेशिक रोजगारीको यात्रामा लाग्ने गरेका छन् । यो समयमा युवायुवतीले सकारात्मक वातावरण पाउन नसक्दा उनीहरू मानसिक रोगको शिकार बन्न सक्छन् ।’ उनले भने ।
युवायुवतीले सकारात्मक वातावरण पाएनन् भने उनीहरूको मानसिक स्वास्थ्यमा असर पार्ने बताउँदै उनले गलत संगत, पारिवारिक समस्याका कारण उनीहरूमा डिप्रेसन देखिने गरिएको बताए ।
विभिन्न अध्ययनले देखाए अनुसार किशोरकिशोरीको मृत्युको दोस्रो कारण आत्महत्या रहेको पाइएको छ । किशोरकिशोरीलाई मानसिक स्वास्थ्य समस्याबाट बचाउन अभिभावकको महत्वपूर्ण भूमिका रहने डा. बस्नेत बताउँछन् । ‘अभिभावकहरुले छोराछोरीको साइकोलोजी बुझ्न जरुरी हुन्छ’, उनले भने । युवा मनलाई स्वास्थ्य बनाउन सके मात्रै देशको विकास र समृद्धि सम्भव रहने उनको भनाइ छ ।
कार्यक्रममा ४५ जना युवायुवतीले भाग लिएका थिए । उनले युवायुवतीलाई लभ र लभपछि छुट्टिँदाको अवस्था कस्तो रहनेबारे पनि युवायुवतीलाई सहजीकरण गरेका थिए । कार्यक्रमको अध्यक्षता लायन्स क्लब अफ दन्तकालीकी अध्यक्ष लायन रुक्मनी मास्केले गरेकी थिइन् । कार्यक्रमको प्रमुख अतिथि धिरज गुरुङ थिए भने विशेष अतिथि रेडक्रसका सभापति उमेश थापा थिए । कार्यक्रमको सन्चालन क्लबका महासचिव लायन इन्द्रबहादुर कार्कीले गरेका थिए ।