धरानः कोभिड–१९ का कारण नेपालमा ८१ प्रतिशत व्यवसाय बन्द भएको छ । नेपालमा चैत ११ पछि असार २ गतेसम्म गरेको एक अध्ययनले ८१ प्रतिशत व्यवसाय बन्द भएको जनाएको हो ।
नेपाल उद्योग परिसंघ (सीएनआई) र अन्तर्राष्ट्रिय श्रम संगठनले गरेको अध्ययनमा १७ प्रतिशतमात्रै व्यवसाय सञ्चालनमा रहेको उल्लेख गरिएको छ ।
सरकारले असारदेखि लकडाउनलाई केही खुकुलो बनाएपछि व्यवसाय खोल्न थालिएको छ । सीएनआईले देशभरका एक सय भन्दा बढी व्यवसायीसँग सर्वेक्षण गरेको थियो । १७ प्रतिशत व्यवसायीले आफ्नो व्यवसाय बन्द नभएको बताएका छन् भने २ प्रतिशतले कुनै प्रतिक्रिया नदिएको अध्ययनमा देखिएको छ ।
सरकारले पूर्ण लकडाउन गरेका बेला अत्यावश्यक बाहेक कुनै व्यापार व्यवसाय सञ्चालन गर्न थिएनन् । सर्वेक्षण गरिएको व्यवसायमध्ये ३२ प्रतिशत प्रतिष्ठानले ११ देखि ५० जनालाई रोजगारी दिएका थिए ।
२८ प्रतिशत प्रतिष्ठानले ५१ देखि २ सय ५० जनालाई रोजगारी दिएका थिए । २२ प्रतिशत प्रतिष्ठानले २ सय ५० भन्दा बढीलाई रोजगारी दिएका थिए । १८ प्रतिशत प्रतिष्ठानले १० जनालाई रोजगारी दिएको अध्ययनमा देखिएको छ । सीएनआईले सेवामूलक उद्योग, ट्रान्सपोर्ट, टेक्स्टाइल, गार्मेन्ट, लेदर फुटवेयर, स्वास्थ्य, हस्तकला, खाद्य, पिय पदार्थ, टोबाको उद्योगलाई अध्ययनमा सहभागी गराइएको छ ।