विराटनगरः प्रदेश १ सरकारले १३ औं दक्षिण एशियाली खेलकुद (साग) मा पदक बिजेता प्रदेश नं १ का खेलाडीहरूलाई सम्मान गरेको छ ।
८८ जना खेलाडीहरुलाई प्रदेश सरकारले पुरस्कारसहित सम्मान गरेको हो । पदक प्राप्त खेलाडीहरूलाई ८० लाख नगद उनीहरूकोे खातामा जम्मा गरिदिएको सामाजिक विकास मन्त्रालयले जनाएको छ । सम्मान र पुरस्कार प्राप्त गरेपछि खेलाडीहरूले प्रदेश सरकारले गरेको सम्मानबाट आफूहरुको खेल क्षेत्रमा हौसला बढेको बताए ।
कार्यक्रममा बोल्दै मुख्यमन्त्री शेरधन राईले खेलकुद क्षेत्रलाई उच्च प्राथमिकता दिएको बताए । ‘खेलकुद क्षेत्र नयाँ ढङ्गले अगाडि बढेको छ’, उनले भने, ‘हामीले प्रदेशमा खेलकुद क्षेत्रलाई उच्च प्राथमिकता दिएका छौं ।’ उनले साग प्रतियोगितमा प्रदेश १ को तर्फबाट बिजेता खेलाडीहरूले देशको साथै प्रदेशको शान बढाएको बताए ।
यसैबीच कार्यक्रममा सामाजिक विकास मन्त्री जीवन घिमिरेले खेलकुदलाई पेशाको रूपमा लिनुपर्ने धारणा राखे ।