धरानः अन्ततः धरानको मुख्य बजार क्षेत्र ४ लेनको हुने नै भएको छ ।
धरान उपमहानगरपालिकाले आव ०७७–७८ को नीति तथा कार्यक्रममा चार लेनको बनाइने जनाइएको थियो तर नगर सभाले नै ४ लेनको नीतिगत निर्णय नै गरेको छ ।
सातौं नगरसभाले आगामी आर्थिक वर्ष २०७७–०७८ को नीति तथा कार्यक्रम र बजेट पारित पनि गरेको छ । यसै क्रममा कोशी लोकमार्गको धरानको मुख्य बजार क्षेत्रमा ८० फुटको बनाउने प्रस्ताव पारित भएको छ ।
यसअघि नगरसभामा प्रस्तुत भएको नीति तथा कार्यक्रममा तीनकुनेदेखि शिवधारासम्मको सडकलाइ सहरी सडक बनाउने घोषणा गरिएको छ । जस अन्तर्गत तीनकुनेदेखि शिवधारासम्म ८० फुटको मापदण्ड कायम गरिने जनाइएको थियो ।
धरान–९ का वडाध्यक्ष रत्न कटुवालले यस विषयमा नीतिगत निर्णय नै भएको बताए । सभामा नगरसभाले विनियोजन विधेयक, आर्थिक विधेयक, वातावरण तथा प्राकृतिक स्रोत संरक्षण सम्बन्धमा व्यवस्था गर्न बनेको विधेयक र राजश्व परिचालन विधेयक २०७७ पनि सर्वसम्मतले पारित गरेको उनले जानकारी दिए ।
धरानको मुख्य सडकबाट कि बाइबासबाट सडक जाने भन्ने विषयले लामो समय बजार तातिएको थियो । धरानको मुख्य सडकबाट विस्तार हुँदा मुख्य बजार नै नरहने भएपछि धरानमा सर्वाधिक चर्चा र चासोको विषय बनेको थियो । चीनसम्म जोड्ने जोगबनी किमाथाङ्कासम्मको ६ लेनको बाटो विस्तारको योजना बनेपछि विवाद बढेको थियो ।
धरान ८ तीनकुनेदेखि सिधै शिवधारा निकाल्ने विषयमा यी क्षेत्रमा रहेका घरधनी, व्यापारी व्यवसायीले विरोध गर्दै आएका थिए । विरोधपश्चात् सेउती खोला छेउबाट बाइपास सडक निर्माण गर्ने राष्ट्रिय योजना आयोगले योजनामै पारी सर्भे समेत गरेको थियो । त्यतिबेला पनि विवाद भएको थियो । वाइपास सडकको डिपिआर तयार गर्न सर्वे नहुँदै विरोध शुरु भएपछि वाइपास सडकबाट प्रभावित सेउती करिडोरका सुकुम्बासीहरूले पनि आफूहरूको उठिबास हुने भन्दै विरोध गरेका थिए ।
कोशी राजमार्गलाई मापदण्डअनुसार विस्तार गर्दा धरानको भानुचोकदेखि छाताचोकबीचको मुख्य बजारको अस्तित्व नै नरहने भएपछि धरान उपमहानगरपालिकाले राष्ट्रिय योजना आयोगमा वाइपास सडकको प्रस्ताव पेश गरेको थियो ।

फोटोः विकास वनेपालीको फेसबुक वालबाट