धरानः लकडाउनले रोकिएको धरानको मालपोत कार्यालयको भवन निर्माण तीब्र गतिमा अगाडि बढिरहेको छ ।
यसअघि लकडाउनका कारण सो भवन निर्माण रोकिएको र अहिले तीब्र गतिमा अघि बढेको प्रमुख दिलशेर राई बताउँछन् । ‘लकडाउन नभएको भए यतिबेला चिटिक्कको भइसक्थ्यो’, उनले भने, ‘लकडाउनपछि अहिले तीब्र गतिमा काम अघि बढेको छ ।’
उनले अहिले भवनको निर्माण कार्य ६० प्रतिशत बढी सकिएको बताए । ‘लगभग ६० प्रतिशत बढी काम अघि बढिसकेको छ’, उनले भने, ‘२०७७ भित्र चिटिक्क बनिसक्छ ।’ उनले २०७७ वैशाख ३ गतेसम्म भवन निर्माण सक्नेगरी सम्झौता भएको बताए ।
उनले अहिले यहाँ भाडा तिर्दै सञ्चालन गरिरहेको र भवन बनिसकेपछि सबै कामकाज त्यहाँबाट गरिने बताए । ‘माथिबाट के निर्णय आउँछ हेरौं, मालपोतको भवन त बनिसकेपछि सारौं अर्थात् नापीको भवन बनिसकेपछि सारौं भन्ने आउँछ’, उनले थपे, ‘नापीको भवन पनि बन्ने प्रक्रियामा छ ।’
उनका अनुसार नापीको भवन निर्माणका लागि अहिले टेण्डर भइसकेको र सम्झौता हुन बाँकी रहेको बताए । ‘नापीकै भवन पनि सोही स्थानमा निर्माण हुनेछ, भवन निर्माणका लागि टेण्डर भएर सम्झौता हुन बाँकी छ ।’ उनले भने ।
अहिले धरान–१६ मा रहेको मालपोत कार्यालयलाई पानबारीमा स्थानान्तरण गर्न लागिएको हो । नमूना कार्यालयको अवधारणामा अघि बढेको सरकारले पानबारीमा मालपोतको भवन बनाएको हो । सरकारले ३ करोड ८२ लाख ८८ हजार ४ सय ३४ रपैयाँ बजेट विनियोजन गरेपछि त्यहाँ भवन बनेको हो । गत वैशाख १ गतेदेखि भवन निर्माण थालिएको तर लकडाउनले रोकिएको थियो । तीन तले भवन बनाउने लक्ष्य लिइएको भवनको आशिष आशिर्वाद जेवी त्रियुगा–१३ उदयपुरले ठेक्का लिएको हो ।
२०७२ सालदेखि नै मालपोतले भाडा तिर्दै आएको छ । लामो रस्साकस्सीपछि धरानमा नापी र मालपोतको सेवा उपलब्ध भएको हो । यसअघि धरानेले इनरुवासम्म पुगेर सेवा लिनुपरिरहेको थियो ।