ताप्लेजुङः ताप्लेजुङमा लाखे जात्राको रौनक शुरू भएको छ ।
नेवार समुदायको धार्मिक र सांस्कृतिक रूपमा गहिरो सम्बन्ध रहेको लाखे जात्राको रौनकले यतिवेला ताप्लेजुङको सदरमुकामका चोक, गल्ली, बजारहरू गुञ्जायमान बन्ने भएको छ ।
नेवार समुदायका अग्रज तथा युवाहरू भेला भएर लाखेजात्रामा ढोल, झ्याम्टा बजाउँदै, नाच, रोपाइँ नाच, विभिन्न हास्यव्यंग्यात्मक कार्यक्रम, जातीय सांस्कृतिक र परम्परा अनुसारको नाच प्रदर्शन गर्दै बजारको परिक्रमा गरिन्छ । यसैगरी जिल्लामा जिल्ला सदरमुकाम र गाउँघरमा गाउँको परिक्रमा गराइन्छ ।
स्थानीय युवाहरू संस्कृति र परम्परा संरक्षणको अभियान स्वरूप कृष्ण शुक्ल पक्षको नाग पञ्चमीदेखि ताप्लेजुङमा जिल्लाको सदरमुकाम फुङलिङ बजारमा नेपाल भाषा तथा सांस्कृतिक समाजका अगुवाइमा एक महिना प्रत्येक वर्ष लाखे जात्रा प्रदर्शन गरिरहेका छन् ।
नेवार समुदायमा प्रचलित लाखे नाच ताप्लेजुङमा निकै लोकप्रिय छ, विस्तारै सरोकारवाला र स्थानीय सरकारले आर्थिक रुपमा बजेट छुट्याउन थालेको नेपाल भाषा तथा संकृतीक समाजका अध्यक्ष शंगर श्रेष्ठ बताए । ताप्लेजुङको सदरमुकाममा मात्र नभएर सिदिङवा गाउँपालिकाको साब्लखु बजार, मेरिदेन गाउँपापिकाको दोभान बजार, आठराई त्रिवेणी गाउँपालिको फुलबारी गाउँ र मैवाखोला गाउँपालिकाको साघँ गाउँमा लाखे जात्रा लाग्र्दै आएको अध्यक्ष श्रेष्ठले जानकारी दिए । लाखे जात्रा द्वापर युगमा भगवान् श्रीकृष्ण र उनका मामा कंशबीचको लडाइँको झल्को दिने गरी विभिन्न गतिविधि गर्दै जिल्लामा नेवार समुदाय भएका बजार क्षेत्रमा लाखे नाच मनाउने चलन सबैका लागि मनोरञ्जनको उत्कृष्ट नमुना भएको पुराना बुढापाकाको भनाइ छ ।
अहिले यो पर्व साझा बनेको छ । जिल्लामा नेवार समुदाय मात्रै नभएर अन्य जातजातिले पनि लाखे नाच्ने थालेको पाइएको छ । ढोल, ढोलकी, झ्याम्टा बजाउँदै हिँड्ने गर्न थालेकोले पनि यो पर्व साझा बन्दै गएको छ ।
फोटोः दिलकुमार