विराटनगरः विराटनगरको कोशी अस्पतालमा बुधबार कोरोना भाइरसका कारण दुईजनाको मृत्यु भएको छ ।
कोशी अस्पतालका मेडिकल सुप्रिटेन्डेन्ट डा. चुमनलाल दासका अनुसार विराटनगर महानगरपालिकाका ४५ वर्षीय पुरुष र रंगेली नगरपालिकाका ४५ वर्षीय पुरुषको मृत्यु भएको हो । अस्पतालको आइसोलेसनमा उपचाररत महानगरपालिका ९ का पुरुषको दिउँसो १ बजेर १० मिनेटमा निधन भएको उनले बताए । जण्डिसका विरामी उनलाई ज्वरो आएपछि परिवारले अस्पतालमा उपचारका लागि भर्ना गरेका थिए ।
बुधबार मृत्यु भएपछि अपरान्ह करिब ३ बजेर ३० मिनेटमा पीसीआर परिक्षण पोजेटिभ आएको अस्पतालले जनाएको छ । त्यस्तै, रंगेली नगरपालिका–८ का ४५ वर्षीय एक पुरुषको कोरोनाका कारण मृत्यु भएको अस्पताका मेसु डा. चुमनलाल दासले जनाए ।
उनको बिहान १०ः३० बजेतिर मृत्यु भएको अस्पतालले जनाएको छ । उनको पनि स्वाब परीक्षण कोशी अस्पतालमै गरिएको र रिपोर्ट साढे ३ बजे आएको हो ।
बिरामी हुँदा कोरोनासँग मिल्ने लक्षण देखिएपछि उनको पनि स्वाब संकलन गरेर कोशीको प्रयोगशालामा परीक्षण गराइएको थियो । योसँगै प्रदेश १ मा कोरोनाका कारण ज्यान गुमाउनेको संख्या ४ चार पुगेको छ । यसअघि, विराटनगर महानगरपालिका ५ का ७७ वर्षीय पुरुषको कोशी अस्पतालमा र मोरङ सुनवर्षी नगरपालिकाका पुरुषको धरानस्थित बीपी कोइराला स्वास्थ्य विज्ञान प्रतिष्ठानमा मृत्यु भएको थियो ।
यसबीच प्रदेश १ मा आज (बुधबार) १८ जना कोरोना संक्रमित थपिएका छन् । मोरङमा १४, इलाममा २, उदयपुर र सुनसरीमा १–१ जनामा संक्रमण देखिएको सामाजिक विकास मन्त्रालयले जनाएको छ ।
प्रदेश १ मा ९० वर्षीया वृद्धासहित ५७ जना डिस्चार्ज भएका छन् । पूर्वाञ्चल विश्वविद्यालय कोभिड १९ आईसोलेसन अस्पतालबाट ३६ जना र कोशी अस्पताल कोभिड १९ उपचार केन्द्रबाट २१ जना डिस्चार्ज भएको सामाजिक विकास मन्त्रालयले जनाएको छ । बुधबार डिस्चार्ज हुनेमा मोरंगका २६, झापाका १६, सुनसरी र इलामका ६–६, धनकुटा, उदयपुर र तेह्रथुमका १–१ जना रहेका छन् । प्रदेश १ मा डिस्चार्ज हुनेको संख्या ८ सय ८७ पुगेको छ ।