पथरीः पहिला एक समय ‘लाग्दैन धुलो गोडैमा एमजी रोडैमा’ गीत चर्चामा थियो र अहिले पनि छ । सँगै भारतको सिक्किममा रहेको एमजी रोडले चर्चा पाएको थियो तर अहिले मोरङको पथरीशनिश्चरे २ को सेल्फीरोडले चर्चा कमाएको छ ।
मंगलबारे र पथरीशनिश्चरे–२ बोक्रे चोकस्थित सेल्फी रोड यतिबेला निकै चर्चामा आएको छ । चौतारी सामुदायिक वन हुँदै पूर्व–पश्चिम राजमार्गसँग जोडिने सेल्फी रोड यतिबेला निकै चर्चामा आएको हो । यो रोड केन्द्रीय सरकारको सांसदकोषबाट ग्राभेल भएपछि कालोपत्रे भएको हो ।
चौतारी सामुदायिक वन उपभोक्ता समूहले संरक्षित गरेर हुर्काइएका साल जातका वृक्षले सितलता प्रदान गर्ने भएकाले सबैको मन जित्न सफल भएको छ । लकडाउनको समयमा गुम्सिएर बस्न बाध्य सर्वसाधारणहरु मनोरञ्जनका लागि टाढाका गन्तव्यस्थल धाउन नपाएपछि यही रोडमा रमाउन र सामाजिक सञ्जालमा छाउन थालेपछि यसले एकाएक चर्चा पाएको हो ।
सामाजिक सञ्जाल टिकटकबाट एका–एक चर्चामा आएको पथरीशनिश्चरे–२ स्थित सेल्फी सडक यतिवेला कोरोना कहर भन्दा ठूलो मनको रहर नैं बनेको छ । कोरोना कहरका कारण ४ महिनासम्म गुम्सिएका मानिसहरु लकडाउन हटेपछि मनोरञ्जनका लागि मन बहलाउन यहाँ आउने गरेका छन् ।
कसैको पूर्वयोजनाबिना एकाएक स्वतस्फुर्त सेल्फी खिच्ने र टिकटक बनाउनेहरुको जमात सामाजिक सञ्जालमा देखिन थालेपछि समितिको ध्यान समेत खिचिएको चौतारी सामुदायिक वनका पूर्व अध्यक्ष तथा सल्लाहकार रत्नबहादुर बस्नेत बताउँछन् ।
पूर्व–पश्चिम राजमार्गको सुनझोडा पुल पश्चिमबाट दक्षिणतर्फ लाग्ने १ हजार १ सय मिटर कालोपत्रे सडक, चौतारी वनले हुर्काएका एक नासका साल जातका रुखमा सेतो रंग पोतेर पटुकी कसेझैं देखिने मनमोहक दृश्यले सबैको मन खिच्ने गर्दछ । एकाएक प्रभावित बनेर पूर्वका विभिन्न ठाउँबाट दैनिक हजारौ मानिसहरु जम्मा हुने भएपछि ब्यापारीहरुको ठेला ब्यापार समेत फस्टाएको छ ।
यस सडकको लागि नगरले समेत चासो लिएको छ भने, सामुदायिक वनले १ लाख रुपैंयाँ खर्चेर सिमेन्टका १० वटा आराम चियर, तरुणदल नगर समिति पथरीशनिश्चरेबाट फोहोर ब्यवस्थापनका लागि १० वटा प्लाष्टिकका डष्टविन, भिड नियन्त्रणका लागि नो पार्किङ्ग बोर्डहरु उपलब्ध गराइएका छन् । यस क्षेत्रमा शौचालयका लागि प्रदेश सांसद शेखरचन्द्र थापाबाट ५ लाख रुपैयाँ सहयोग प्रदान गर्ने बचनबद्धता मिलेको र विभिन्न क्षेत्रबाट सहयोगी हातहरुले चासो बढाइरहेको कुरा चापागाईले जानकारी गराए ।
यस क्षेत्रमा आन्तरिक पर्यटकहरुको ध्यान खिच्न आगामी दिनमा सेल्फी सडकमाथि डोरीको झोलुङ्गे पुल, सुनझोडा खोलामा झोलुङ्गे पुल, चौतारी सामुदायिक वनको हातामा वनवाटिका, रोटेपिङ्ग, लिङ्गे पिङ्ग, चाकाचुली, डुङ्गा सहितका माछा पोखरी लगायत निर्माण गर्ने लक्ष्य रहेको समाजसेवी दिलिप राईले बताए । यस सडकको स्तरोन्नतीका लागि वडाको पहलमा १ सय पचास वटा फूलका विरुवा रोपिइसकेको छ भने नगरका सबैको चासो थपिएको छ । यसका लागि डिपिआर तयार गरी आवश्यकीय कुराहरु थप्ने योजना रहेको वडा सदस्य पर्शुराम न्यौपानेको भनाइ छ ।
कतिपय ठाउँहरुमा पर्यटकहरु तान्न ठुलै कसरत गर्दा समेत असफल भइरहेको अवस्थामा पथरीशनिश्चरेलाई चिट्ठा परेको छ । यसलाई अवसरका रुपमा लिएर विवेक पुरयाउन नसके पछुताउनु बाहेक अर्को विकल्पन हो भन्न सकिन्न । असावधानी बाक्लो भीडले कोरोना सार्न सक्ने, दुर्घटना बढाउन सक्ने चिन्ता समेत थपेको छ । यहाँ आएर रमाइलो गर्ने नाममा पछुतो नबनोस्, त्यसैले यो समय अवधिभरी केही समय यहाँ पनि लकडाउन नै पो गर्ने कि । फोटोः गुगल