धरानः धरानमा बुधबार धरान–१३ फुस्रेका ११ जना नेपाली सेना र ५ जना भारतीय सेनासहित १७ जनामा कोरोना संक्रमण पुष्टि भएको छ ।
धरान उपमहानगरपालिकाका स्वास्थ्य महाशाखा प्रमुख उमेश मेहेताले बुधबार नै २२ जनामा कोरोना पुष्टि भएको जानकारी दिए । बिहान ५ जनामा संक्रमण पुष्टि भइसकेको छ ।
धरान १७ रेल्वेमा आमाछोराको मृत्यु भएपछि तीनजनामा पोजेटिभ रिपोर्ट आएको थियो भने धरानस्थित बीपी कोइराला स्वास्थ्य विज्ञान प्रतिष्ठानामा स्वाब दिइएका अन्य दुईजनामा पनि कोरोना पुष्टि भएको छ । इलाका प्रहरी कार्यालय धरानका थुनुवामा पनि कोरोना पोजेटिभ रिपोर्ट आएको हो ।
बुधबार बेलुका संक्रमण पुष्टि हुनेहरूमा धरान–१३ फुस्रे सैनिक क्याम्पमा कार्यरत १३ जना नेपाली सेनाको परीक्षण गरिएकोमा ११ जनाको रिपोर्ट पोजेटिभ आएको उनले जानकारी दिए । संक्रमित ती नेपाली सेनाहरूको उमेर २४ देखि ३६ वर्ष उमेर समुहका रहेका छन् ।
यस्तै, ५ जना भारतीय सेनामा पनि कोरोना संक्रमण भएको छ । संक्रमण हुनेमा धरान–१३ बस्ने ४३ वर्षीय पुरुष, धरान–१६ का ३९ वर्षका २ जना पुरुष, २९ वर्षका पुरुष रहेका छन् । यस्तै, धरान–१७ घर भएका ३० वर्षीय पुरुष रहेको उनले जानकारी दिए ।
उनले धरान–११ को किसानपथ निवासी एक ५७ वर्षीया महिलाको पनि कोरोना पोजेटिभ रिपोर्ट आएको जानकारी दिए । योसँगै धरानमा कोरोना संक्रमितको कुल संख्या १ सय ९५ पुगेको छ । उनले बुधबार नै सबै सेनाको कोरोना परीक्षण गरिएको पनि जानकारी दिए ।