धरानः धरानमा फेरि दुई कोरोना संक्रमितको मृत्यु भएको छ । योसँगै प्रतिष्ठानमा मृत्यु हुनेको संख्या २१ पुगेको छ ।
प्रदेश २ अन्तर्गत राजविराज–७, सप्तरीका दुई पुरुषको मृत्यु भएको भएको धरानस्थित बीपी कोइराला स्वास्थ्य विज्ञान प्रतिष्ठानका प्रवक्ता डा. निदेश सापकोटाले जानकारी दिए । सप्तरीका ५० र ५५ वर्षीयको मृत्यु भएको उनले जानकारी दिए । ५५ वर्षीय पुरुषको छिन्नमस्ता अस्पताल, सप्तरीबाट रेफर गरिएको थियो । उनमा कमजोरी, अल्परक्त, मधुमेहको समस्या नियन्त्रण हुन नसकेको जनाइएको छ । बिरामीमा पहिलेदेखि अन्य रोगरदीर्घ रोग पनि रहेको जनाउँदै उनले विगत १५ वर्षदेखि मधुमेह र उच्च रक्तचापको समस्या समेत रहेको जानकारी दिए । गत ७ गते उनको कोरोना पुष्टि भएको थियो ।
उनी बीपीको कोभिड अस्पतालमा गत ४ गते भर्ना भएका थिए । ८ गते मेडिसिन वार्ड हुँदै कोडिड अस्पतालमा सारिएका उनको आइसियुमा उपचार भइरहेको थियो । बिहीबार दिउँसो १ः१५ बजे उनको मृत्यु भएको उनले जानकारी दिए ।
यस्तै, राजविराज–७ कै ५० वर्षीय अर्का पुरुषको पनि मृत्यु भएको छ । राजविराज अस्पतालबाट रेफर गरिएका उनको २ बजेर २ मिनेटमा मृत्यु भएको हो । उनी बिहीबार दिउँसो १ः२० बजे प्रतिष्ठानको इमरजेन्सीमा सिकिस्त अवस्थामा भर्ना भएका थिए । उनको आजै पिसिआर परीक्षणका क्रममा कोरोना पुष्टि भएको थियो ।
मृतकको चारदिनदेखि ज्वरो, श्वासप्रश्वासमा समस्या तथा शरीर सिथिल हुने समस्या भएको पाइएको थियो । उनी मधुमेहको दीर्घरोगी भएको पाइएको प्रवक्ता डा. सापकोटाले जानकारी दिए । शवको व्यवस्थापन स्वास्थ मापदण्डअनुसार भइरहेको उनले जानकारी दिए ।