धरानः धरानमा कोरोना संक्रमित बढ्दै गएका छन् । दिनहुँजसो संक्रमित थपिएका थपियै छन् ।
धरानमा शुक्रबार ६९ जनामा कोरोना पुष्टि भएको छ । धरान उपमहानगरपालिकाका स्वास्थ्य महाशाखा पञ्मुख उमेश मेहताले सर्वसाधारण, विभिन्न कार्यालयका कर्मचारीसहित यतिका संख्यामा संक्रमित बढेका हुन् ।
संक्रमित हुनेहरूमा अनुसन्धानका वरिष्ठ कर्मचारी, वकिल, उपमहानगरपालिकाका ७ जना कर्मचारी, २ जना जनप्रतिनिधिलगायत सर्वसाधारणमा संक्रमण पुष्टि भएको उनले जानकारी दिए । धरानस्थित बीपी कोइराला स्वास्थ्य विज्ञान प्रतिष्ठान र एन्फा क्वारेन्टाइनस्थलमा मा स्वाब संकलन गरिएकाहरुमा कोरोना पुष्टि भएको उनले जानकारी दिए ।
कतिपय संक्रमितमा रुघा लाग्ने, ज्वरो आउने छ भने कतिपयमा केही लक्षण छैन । ‘धेरैमा हल्काफुल्का ज्वरो छ, अन्यमा केही लक्षण छैन ।’ उनले भने । संक्रमितमध्ये अधिकांश होम आइसोलेसनमै रहेको उनले जानकारी दिए ।
‘धरानमा लकडाउन खुल्यो, कोरोना भुल्यो’
सर्वसाधारणले लकडाउन खुलेपछि हेलचेक्रयाइँ गरिदिँदा यो अवस्था आएको उनले बताए । ‘दिनहुँजसो संक्रमित बढिरहेका छन्, अझै बढ्छ, किनभने मानिस सतर्कता अपनाउँदैनन्, सचेत छैनन्, जहीँतहीँ बजारमा भीडभाड छ । भनौं, लकडाउन खुल्यो, कोरोना भुल्यो गरेपछि यस्तो अवस्था आएको हो ।’ उनले थपे, ‘आत्तिएर हुँदैन, सतर्कचाहिँ बन्नुपर्छ ।’