सुनसरीः सुनसरीको इटहरी उपमहानगरपालिका–८ मा रहेको एक किराना पसलबाट ठुलो परिणामको पटकासहित ३ जना पक्राउ परेका छन् । पक्राउ पर्नेहरुमा इटहरी उपमहानगरपालिका–११ का २५ वर्षीय प्यारचन्द चौधरी, २३ वर्षीय गणेश चौधरी र किराना पसल संचालक ताहिर मियाँ रहेका छन् ।
मियाँको किराना पसलबाट प्रतिबन्धित विष्फोटक पदार्थ पटकाहरु भण्डारण, ओसारपसार तथा बिक्रीवितरण भइरहेको छ भन्ने गोप्य सूचनाको आधारमा दिउँसो इलाका प्रहरी कार्यालय इटहरीबाट खटिएको प्रहरी टोलीले ३३ बण्डल विभिन्न किसिमका पटका बरामद गरेको हो ।
पटका सहित पक्राउ परेका मानिसहरुलाई इलाका प्रहरी कार्यालय इटहरीमा राखी कानुनी कारवाही अगाडि बढाइएको सो कार्यालयले जनाएको छ । यसैगरी झापाको अर्जुनधारा र नकलबन्दो एरियाबाट ६ लाख ५० हजार बराबरको पटका बरामद भएको छ । जिल्ला प्रहरी कार्यालय झापाबाट खटिएको प्रहरी टोलीले दिउँसो उक्त मुल्य बराबरको पटका बरामद गरेको हो । बरामद भएको पटकाहरु आवश्यक कारवाहीको लागि जिल्ला प्रहरी कार्यालय झापामा राखिएको सो कार्यालयले जनाएको छ ।