धरानःनेपाली संगीत क्षेत्रको लोकप्रिय ब्यान्ड नेपथ्यले पहिलोपटक इटहरीमा भव्य सांगीतिक प्रस्तुति दिएको छ ।
इटहरी रंगशालामा आज (कात्तिक १८ गते) सम्पन्न ‘नेपथ्य इन कन्सर्ट २०२६’ मा १० हजारभन्दा बढी दर्शकको उपस्थिति रहेको बताइएको छ ।
नेपथ्यको प्रत्यक्ष प्रस्तुति हेर्न पूर्वी नेपालका विभिन्न स्थानबाट संगीतप्रेमीहरू इटहरी रंगशालामा पुगेका थिए । लामो समयदेखि रेडियो, टेलिभिजन तथा डिजिटल माध्यमबाट नेपथ्यका गीत सुन्दै आएका दर्शकले आफ्नै सहरमा ब्यान्डलाई प्रत्यक्ष हेर्न पाउँदा उत्साहपूर्वक सहभागिता जनाएका थिए ।
पूर्वाञ्चल इभेन्ट्स प्रालिको आयोजनामा तथा इटहरी उपमहानगरपालिकाको प्रवर्द्धनमा कार्यक्रम भएको हो । करिब १० हजार दर्शक क्षमताको व्यवस्थापनसहित तयारी गरिएको रंगशालामा अपेक्षाभन्दा बढी दर्शक सहभागी भएका आयोजकले जनाएको छ ।
तीन दशकभन्दा लामो समयदेखि नेपाली संगीत क्षेत्रमा सक्रिय नेपथ्यले आफ्ना लोकप्रिय गीतमार्फत दर्शकलाई मनोरञ्जन प्रदान गरेको थियो । ‘छेक्यो छेक्यो’, ‘जोमसोमे बजारमा’, ‘रेशम’ र ‘भेडाको ऊनजस्तो’ लगायत चर्चित गीतमा दर्शकले साथ दिएका थिए ।